"Boeing"in "Starliner" kosmik aparatı ilə ötən il Beynəlxalq Kosmik Stansiyaya (ISS) göndərilən ABŞ astronavtları Butç Uilmor və Sunita Uilyams 286 gün sonra Yerə qayıtdıqdan sonra yaşadıqları qorxulu anları ilk dəfə açıqlayıblar.

Sfera.az xəbər verir ki, onların missiyası cəmi 8 gün üçün planlaşdırılmışdı.

Lakin "Starliner" aparatında yaranan texniki nasazlıq səbəbilə onlar təxminən 10 aya yaxın ISS-də qalıblar.

Astronavtlar açıqlamalarında kosmik stansiyaya yaxınlaşarkən aparatın idarəetməsində ciddi nasazlıq baş verdiyini anlayıblar. Uilmorun sözlərinə görə, o, "Starliner"i əl ilə idarə etməyə çalışarkən dörd əsas itici mühərrik sıradan çıxıb və bunun nəticəsində aparatı istiqamətləndirmək mümkün olmayıb.

“Butun nəzarəti itirdiyimi düşündüm. O an dünyaya geri dönə bilməyəcəyimizdən qorxdum”, – deyə Uilmor yaşadığı qorxunc anları bölüşüb.

Sunita Uilyams isə bildirib ki, mühərriklərin niyə işləmədiyini anlamayıblar və problemi necə həll edəcəkləri barədə heç bir təsəvvürləri olmayıb.

NASA-nın müdaxiləsi ilə mühərriklər yenidən işə salınıb və "Starliner" ISS-yə uğurla birləşdirilib. Lakin bu proses zamanı hər iki astronavt bir müddət kosmik boşluqda nəzarətsiz vəziyyətdə qalıb.

Uilmor qayıdışın qeyri-müəyyən olduğunu deyərək qeyd edib:

“Birləşmədən sonra belə bu aparatla Yerə dönə bilməyəcəyimizi düşündüm. Uçuş direktoru ilə əlaqə saxlayıb soruşdum: "Bu aparat bizim üçün təhlükəsizdirmi?"”.

Uilyams isə stansiyaya uğurla çatdıqları an yaşadığı sevinci balaca bir sevinc rəqsi ilə qeyd etdiyini bildirib.

Hazırda hadisə ilə bağlı araşdırmalar davam etdirilir. "Boeing" və NASA təhlükəsizlik protokollarını yenidən nəzərdən keçirmək üçün birgə iş aparırlar.

Bəsti Rəfizadə

Astronavtlar yaşadıqları dəhşətli anları danışdılar: "Geri dönə bilməyəcəyimizdən qorxduq"