Okeandakı “qara ləkə” - Ağaclar adanı gizlədibmiş - FOTO
Peyk xəritələrində okeanın ortasında görünən nəhəng qara dəlik sosial media istifadəçilərində çaşqınlıq yaradıb. Sosial media istifadəçiləri qara dəliyin hərbi baza, yadplanetlilərlə əlaqəli bir ərazi və ya kəşf edilməmiş təbiət möcüzəsi ola biləcəyini düşünüblər.
Sfera.az "CNN News"a istinadən xəbər verir ki, sözügedən qara ləkə əslində Sakit okeanda yerləşən Vostok adasıdır. Kiribati Respublikasına aid bu ada, peyk görüntülərində tamamilə qara görünsə də, bunun səbəbi adanı sıx şəkildə örtən Pisonia ağaclarıdır.
Mütəxəssislər bildiriblər ki, bu ağaclar birlikdə o qədər sıx böyüyür ki, peyk xəritələrində adanı qapqara göstərir. “Qara olaraq gördüyünüz şey əslində çox tünd yaşıldır”, – deyə araşdırmaçılar məsələyə aydınlıq gətiriblər. Adanın sirri açıldıqdan sonra belə, ona olan maraq azalmayıb.
Tarixi mənbələrə görə, Vostok adası ilk dəfə 1820-ci ildə rus tədqiqatçısı tərəfindən kəşf edilib. Daha sonra adaya 1860-cı ildə ABŞ, 1873-cü ildə isə İngiltərə tərəfindən iddia irəli sürülüb. Lakin hazırda ada Kiribati Respublikasına məxsusdur və burada insan yaşamır. Vostok adası təkcə sirli görüntüsü ilə deyil, həm də toxunulmamış təbiəti ilə diqqət çəkməyə davam edir.
Bəsti Rəfizadə
