Dünyanın ən bahalı saat markası pulu, hər hansı əlaqəsi olmayan, yetim bir uşaq tərəfindən yaradıldı...Söhbət hamıya məlum olan “Rolex” saat markasından gedir, şirkətin yaranma tarixçəsi olduqca maraqlıdır.

Saat sənayesinin ən ikonik markalarından biri necə meydana gəlib?

Sfera.az bununla bağlı maraqlı məlumatları təqdim edir:

Belə ki, “Rolex”in əsası yetim bir uşaq olan Hans Uilsdorf tərəfindən qoyulub. Hans “Rolex”i yaratmaqla məşhur olsa da, onun şəxsi həyatı və keçdiyi çətinliklər də uğur hekayəsinin əsas hissəsidir.

Hans Uilsdorf kim idi?

Hans 1881-ci ildə Almaniyanın Kulmbak şəhərində doğulub. O, çox gənc yaşda ikən valideynlərini itirir və yetim qalır. Bu, onun üçün böyük travma və çətinlik olur. Kiçik yaşda valideyn dəstəyindən məhrum olmaq onu daha müstəqil olmağa və həyatda irəliləmək üçün öz yolunu tapmağa məcbur edir. Yetim olduğu üçün həyatının erkən illərində çox mübarizə aparır. Valideynlərinin ölümündən sonra Uilsdorfun və qardaşlarının təhsilini və böyüməsini təmin edən qohumları var idi. Ancaq yetim qalmaq onun psixoloji durumuna və şəxsiyyətinə dərin təsir göstərir.

Şəxsi həyatı da çətin keçir...

Hans şəxsi həyatında da bəzi itkilərlə üzləşir. O, Florens Frans May Kroti adlı qadınla evlənir. Cütlük xoşbəxt bir ailə həyatı qursa da, təəssüf ki, onların uşaqları olmur. Florens ərinin böyük dəstəkçilərindən idi. Lakin 1944-cü ildə o, xərçəng xəstəliyindən vəfat edir. Hans üçün bu, çox böyük bir itki idi. Həyat yoldaşını itirdikdən sonra Uilsdorf daha da çox işə yönəlir və bütün enerjisini “Rolex”in inkişafına sərf edir.

Karyerası necə başladı?

Hans çətin bir uşaqlıq keçirsə də, onun gələcəyə dair böyük ambisiyaları var idi. O, gənc yaşlarında, 1900-cü illərin əvvəllərində karyerasına İsveçrədə, “Cuno Korten” adlı şirkətdə başlayır. Burada beynəlxalq saat ticarəti ilə maraqlanır. Hans bu işdə saat mexanizmlərinin necə işlədiyini öyrənir və saat sənayesi haqqında geniş biliklər əldə edir. Lakin onun saatlarla bağlı inqilabi fikirləri o zamanın bazar tələblərinə uyğun gəlmirdi. Həmin zaman qol saatları çox dəqiq hesab edilmir, daha çox cib saatlarına üstünlük verilirdi. Uilsdorf isə kiçik, dəqiq qol saatlarının gələcəyinə inanırdı. Bu fikri həyata keçirmək üçün ciddi çətinliklər yaşasa da, sonda inadı və peşəkarlığı ilə uğur qazandı.

“Rolex”in yaradılması...

Hans 1905-ci ildə Londona köçərək öz şirkətini, “Wilsdorf & Davis” firmasını qurdu. Bu şirkət saatları İsveçrədə istehsal edir və İngiltərəyə gətirərək satışını təşkil edirdi. Uilsdorf xüsusilə kiçik, dəqiq və etibarlı mexanizmlər yaratmaq üzərində çalışdı. Çünki həmin dövrdə cib saatları daha populyar idi və qol saatları dəqiqlik və etibarlılıq baxımından hələ çox inkişaf etməmişdi.

1908-ci ildə Uilsdorf saatlarına daha yadda qalan və qlobal səviyyədə qəbul ediləcək bir ad seçmək qərarına gəldi.

“Rolex” adı bu zaman yarandı.. “Rolex” adı həm sadə, həm qısa, həm də müxtəlif dillərdə asan tələffüz olunan bir marka adıdır. Florensin ölümündən sonra isə Hans Uilsdorf şəxsi varisi olmadığı üçün “Rolex”in gələcəyi barədə düşünməyə başladı.

O qərar verdi ki, şirkət gələcəkdə də öz missiyasını davam etdirsin və sahibkar məqsədləri ilə məhdudlaşdırılmasın. Bu məqsədlə o, 1945-ci ildə “Hans Wilsdorf Foundation” adlı fondu qurdu və “Rolex” şirkətini bu fonda təhvil verdi.

Bu fondun əsas məqsədi “Rolex”in gələcəkdə də müstəqil və uğurlu şəkildə fəaliyyət göstərməsini təmin etmək idi. Beləliklə, “Rolex” günümüzə qədər bir ailə biznesi olmadan, Hansın qoyduğu ideallar əsasında inkişaf etməyə davam etdi.

Zirvəyə gedən yol....

Hans “Rolex”i quranda əsas məqsədi dəqiq və etibarlı qol saatları yaratmaq idi. Lakin bu məqsədə çatmaq o qədər də asan olmadı. O, zamanında qol saatlarının yüksək keyfiyyətli mexanizmlər hazırlamaq üçün uyğun olmadığını düşünən sənaye nümayəndələri ilə üzləşdi. Lakin Uilsdorf yeniliklərə çox açıq idi və qol saatlarının gələcəkdə çox geniş yayılacağına inanırdı.

Bu inamla, o, qol saatlarını dəqiq və davamlı mexanizmlərlə təmin etməyə başladı. Nəticədə “Rolex” saatları keyfiyyət və dəqiqlik baxımından tanınmağa başladı. 1910-cu ildə “Rolex”in bir qol saatı İsveçrədə dəqiqlik testi keçərək qol saatları arasında ilk dəfə rəsmi xronometr sertifikatı aldı. 1926-cı ildə “Rolex” dünyanın ilk su keçirməyən saatını — “Rolex Oyster” modelini təqdim etdi.

1931-ci ildə Hans Uilsdorf “Rolex”in avtomatik mexanizmlər üzərində işini inkişaf etdirdi və avtomatik özünü quran mexanizmləri olan saatları bazara çıxardı. Bu, saat sənayesində başqa bir böyük irəliləyiş oldu.

Hans Uilsdorf 1960-cı ildə vəfat etdi.

Çətinliklərlə qurduğu “Rolex” markası isə dünyanın ən prestijli saat markalarından biri oldu. Beləliklə, yetim bir uşağın çətinliklərlə dolu həyatından lüks saatlar dünyasının zirvəsinə çıxması hekayəsi Hans Uilsdorf və onun yaratdığı “Rolex” ilə mümkün oldu.

Günay Rəsulqızı

Yetim bir uşaq dünyanın saatını dəyişdi... - "Rolex" necə yarandı? - FOTOLAR