ABŞ və Çin arasında ticari müharibə gərginləşir- Tariflər 245 faizə çatdı
ABŞ və Çin arasında uzun müddətdir davam edən ticarət müharibəsi Vaşinqtonun Çin mallarına qarşı yeni, ağır tariflər tətbiq etməsi ilə daha da kəskin xarakter alıb.
Sfera.az xarici mediaya istinadən xəbər verir ki, ABŞ Çin məhsullarına tətbiq edilən gömrük tariflərini əvvəlcə 125 faizə, daha sonra isə 145 faizə qədər artırıb.
Ticarət qarşıdurmasının fonunda Çin də cavab addımları atmağa başlayıb. Pekin yarımkeçirici və aerokosmik sənayelər üçün həyati əhəmiyyət daşıyan bəzi nadir torpaq elementləri və maqnitlərin ABŞ-a ixracını dayandırmaq qərarına gəlib.
ABŞ rəhbərliyi isə Çinin geri çəkilməməsi və cavab tədbirlərini davam etdirməsi ilə bağlı ciddi narahatlığını ifadə edib. Ağ Ev kritik mineral idxalı ilə bağlı milli təhlükəsizlik araşdırması başladıldığını açıqlayıb.
ABŞ administrasiyası xəbərdarlıq edib ki, Çin tərəfinin cavab tədbirləri davam edərsə, bəzi məhsullar üzrə tarif dərəcələri 245 faizə qədər yüksələ bilər. ABŞ mediasının yaydığı məlumata görə, bu əlavə vergi artımları şprislər və iynələr kimi tibbi ləvazimatlarla yanaşı, polad, alüminium və avtomobil sektorlarını da əhatə edəcək.
Mütəxəssislər vəziyyətin daha da gərginləşməsinin qlobal ticarətə və təchizat zəncirlərinə ciddi təsir göstərə biləcəyini bildirirlər.
Fidan Hacızadə
