“Telegram” böyük kibercinayətkar şəbəkəni çökdürdü - 35 milyard dollar qazanmışdılar

Populyar mesajlaşma platformalarından biri olan “Telegram” Çin mənşəli ən böyük iki qeyri-qanuni onlayn “Xinbi Guarantee” və “Huione Guarantee” platformalarını bağladığını açıqlayıb. Sözügedən şəbəkələrin 2021-ci ildən bəri fəaliyyət göstərərək kibercinayətkarlara xidmət etdiyi və bu fəaliyyətlərdən 35 milyard dollardan çox gəlir əldə etdiyi bildirilir.

Sfera.az xarici mediaya istinadən xəbər verir ki, “Telegram”ın bu addımı kibercinayətkarlıqla mübarizədə mühüm dönüş nöqtəsi kimi qiymətləndirilir.

Platformaların bağlanmasından sonra, “Huione Guarantee” öz fəaliyyətini tamamilə dayandıracağını təsdiqləyib. “Blokçeyn” texnologiyaları üzrə araşdırmalar aparan “Elliptic” şirkətinin proqnozlarına görə, bu bağlanma onlayn fırıldaqçılıq şəbəkələrinə ciddi zərbə vuracaq.

Qeyd olunan qeyri-qanuni platformalar oğurlanmış məlumatların satışı, çirkli pulların yuyulması və telekommunikasiya infrastrukturu üzrə xidmətlər təqdim etməklə məşğul olub. “Huione Guarantee” platformasının sahibi olan “Huione Group” ABŞ Maliyyə Nazirliyi tərəfindən “Amerika vətəndaşlarından milyardlarla dollar oğurlayan cinayətkar şəbəkələri dəstəkləməkdə” ittiham olunub və ABŞ maliyyə sistemindən uzaqlaşdırılıb.

Bundan əlavə, qrupun Şimali Koreya tərəfindən həyata keçirilən kiber oğurluq hadisələrindən azı 37 milyon dollar, eləcə də “donuz kəsmə” kimi tanınan fırıldaqçılıq üsulu ilə 36 milyon dollar vəsait "yuduğuna" dair şübhələr var.

“Telegram” nümayəndəsi “Reuters” agentliyinə açıqlamasında bildirib ki, platformada fırıldaqçılıq və çirkli pul yuma kimi fəaliyyətlər qəti şəkildə qadağandır və belə hallar aşkarlanarsa, dərhal aradan qaldırılır.

Bəsti Rəfiadə
Sfera.az