Əhməd Əhmədovla bağlı verilən qərar müzakirə obyektinə çevrilib. Qərar çoxları tərəfindən birmənalı qarşılanmayıb. Belə ki, bəziləri bu qərarın ədalətli olmadığını düşünür və iddia edir ki, Əhməd cəzaçəkmə müəssisəsinə göndərilməli idi. 

 
Maraqlıdır, məhkəmənin Əhməd barəsində verdiyi qərar nə qədər ədalətlidir?

 
Sfera.az-a mövzu ilə bağlı açıqlama verən vəkil Turan Abdullazadə bildirib ki, məhkəmə ədalətli qərar verib:

“Əhməd Əhmədovun azadlıqdan məhrum edilməməsinə görə bütün Azərbaycan şokdadır. Axı burada təəccüblənəcək nə var? Bəyəndiyiniz anqlosakson hüquq sistemi, Amerika məhkəmələrində belə psixi xəstəni azadlıqdan məhrum etmir. Bütün dünyada ağır psixi xəstələr məcburi psixiatriya mərkəzinə yerləşdirilir. Bunu da bilmək vacibdir ki, məcburi psixiatriya mərkəzindəki rejim həbsxanadan daha çətin və ağırdır. Yəni bu məsələyə tamamən son qoymaq lazımdır. Məhkəmənin qərarı təmamilə ədalətli və obyektivdir. Məhkəmə qərarında hər hansısa problem yoxdur”. 

Hüquqşünas qeyd edib ki, Əhmədin cəzaçəkmə müəssisəsinə göndərilməsi daha təhlükəlidir:

“Bir anlıq düşünün ki, Əhməd Əhmədovu cəzaçəkmə müəssisəsinə göndərirlər. Onun qaldığı kamerada başqa məhkumlar da olacaq. Siz düşünmürsünüzmü ki, onları da qətlə yetirə bilər? Tutaq ki, tək kamerada saxladılar, o penitensiar xidmətin əməkdaşını öldürə bilər. Həyat tək küçə və evdən ibarət deyil. Bəs cəzaçəkmə müəssisəsində yaşayan minlərlə məhkum var axı. Onları da düşünmək lazımdır. Onları Əhməddən kim qoruyacaq?” 

T.Abdullazadə sonda vurğulayıb ki, bu cür psixi xəstələrin adətən sağalma ehtimalı olmur və onların psixiatriya müəssəsindən sağaldıqdan sonra buraxılması çox nadir baş verir, Əhmədin də 1 il sonra sağalması ağılabatan deyil. Ona görə də narahat olmağa dəyməz.  

Qeyd edək ki, beş ailə üzvünü qətlə yetirməkdə ittiham olunan Əhməd Əhmədov barəsində məhkəmə qərar çıxarıb. Qərara əsasən, Əhməd Əhmədov cəzadan azad edilib. Onun barəsində Maştağa qəsəbəsində yerləşən ixtisaslaşmış psixatriya xəstəxanasında məcburi müalicə qərarı verilib.

Firuzə Əliyeva