Yanacağın bahalaşması inflyasiya sürətinə təsir edəcəkmi? - İyun ayından...
![Yanacağın bahalaşması inflyasiya sürətinə təsir edəcəkmi? - İyun ayından...](https://sfera.az/photo/orginal/2024/07/10/1720608844_1719997036_1719996094_233111_3lvq96iwsa-1.jpg)
2024-cü ilin iyununda Azərbaycanda illik inflyasiya 1,1 faizə yüksəlib.
Sfera.az Dövlət Statistika Komitəsinin məlumatlarına istinadən xəbər verir ki, bu ilin aprelinə kimi illik inflyasiya sürətində azalma tempi müşahidə edilsə də son 2 ayda bahalaşmanın sürəti artıb.
Xatırladaq ki, 2023-cü ilin sonunda 2,1 faiz olan illik inflyasiya apreldə sıfır həddinə düşmüşdü. Amma bu ilin may ayından yenidən inflyasiya sürətində güclənmə baş verib.
Mayda illik bahalaşma 0,3 faizə yüksələndən sonra iyunda 1,1 faizə çatıb. İllik inflyasiya ilə bərabər dövrü inflyasiyanın da sürəti güclənir.
2024-cü ilin yanvar-may dövründə orta inflyasiya 0,6 faiz olduğu halda, yanvar-iyunda orta inflyasiya 0,7 faizə yüksəlib. İllik inflyasiya sürətinin yenidən güclənməsi ərzaq məhsulları ilə bağlıdır. Artıq iyun ayından ərzaq qiymətlərində enmə dayanıb. Halbuki əvvəlki aylarda illik müqayisədə ərzaq məhsullarında ucuzlaşma 1-2 faiz təşkil edirdi.
Son aylarda dünyada ərzaq qiymətlərinin artması Azərbaycanda da müşahidə olunur. Böyük ehtimalla iyul ayında inflyasiya sürətində güclənmə davam edəcək. Yanacağın bahalaşmasının inflyasiya sürətinə artırıcı təsir edəcəyi dəqiqdir.
Vasif