“Qarabağ”ın baş məşqçisi Qurban Qurbanov “Zirə” ilə bu gün keçirilən yoxlama matçından sonra fikirlərini bölüşüb.

Sfera.az xəbər verir ki, o, 4:0 hesabı ilə qalib gəldikləri matçı belə şərh edib:

“Maraqlı oyun alındı. Xüsusən də, birinci hissədə rəqib çox yaxşı təşkilatlanmış şəkildə görünürdü. İkinci hissə bir qədər fərqli oldu. Erkən qollar vurduq, oyun bizim üçün asanlaşdı. Bəzi səhvlərimiz oldu ki, bu da gözlənilən idi. Çünki futbolçuların hazırlıq durumu hələ qaydasında deyil. Belə məqamda onlardan yüksək dinamikli oyun tələb etmək də düzgün olmazdı. Komandanın fiziki durumu hələ tam istədiyimiz səviyyədə deyil.Ümumən oyunçuları daha yaxşı gördüm. Lakin səhvlərimiz var idi. Bəzi qəbulolunmaz səhvlər oldu. Onları burada görməyimiz daha yaxşıdır. İnşallah, Avstriya toplanışında çatışmazlıqlara daha çox diqqət ayıracağıq”.

Baş məşqçi transfer çalışmalarının davam etdiyini bildirib: “Həmişə olduğu kimi, transfer danışıqları gedir. Bu məsələnin üzərinə çox ciddi düşmüşük. Ola bilər, qarşıdakı günlərdə, ola bilər 10 gündən sonra, yaxud bir aydan sonra reallaşsın. Bu, elə bir prosesdir ki, dərhal həll olunmur. Çalışırıq ki, bir yox, bir neçə transfer reallaşdıraq”.

Q.Qurbanov mətbuatda “Qarabağ”la müqaviləsinin bu gün başa çatmasının göstərilməsi ilə bağlı isə deyib: “Hələ müqaviləm var. Səhv eləmirəmsə, 2027-ci ilə kimidir”.

Q.Qurbanov Çempionlar Liqasındakı potensial rəqiblərin oyununa köməkçilərindən kimisə göndərmək fikrində olmadığını da qeyd edib.

“Qarabağ”ın çalışdırıcısı “Zaqreb “Dinamo”sunun müdafiəçisi Sami Mmaenin adı transfer siyahınızda var?” sualını belə cavablandırıb: “Ola bilər siyahıda olsun”.

Qurban Qurbanovdan transfer açıqlaması - O da “Qarabağ”a gəlir?