"Real"ın Arda ilə bağlı planı ÜZƏ ÇIXDI

UEFA Çempionlar Liqasının 1/4 final mərhələsində "Arsenal"a iki oyunun nəticəsinə görə uduzaraq turnirdən kənarda qalan "Kral klubu" baş məşqçi Karlo Ançelotti ilə yollarını ayıracağı barədə düşünür. 

 

Sfera.az Türkiyə mətbuatına istinadən xəbər verir ki, bu barədə İspaniyanın "Sport" nəşri yazıb.

 

Mənbə qeyd edir ki, "Real Madrid" rəhbərliyi Ançelottidən sonra komandanın sükanını "Bayer Leverkuzen"in baş məşqçisi Xabi Alonsoya təhvil vermək niyyətindədir. 
 

Klub prezidenti Florentino Peres və idarə heyəti Alonsonu komandaya gətirmək üçün Leverkuzenə gənc futbolçulardan birini icarəyə, ya da satış yolu ilə təklif etməyi planlaşdırır.

Mənbənin iddiasına görə, bu futbolçular arasında Türkiyə millisinin və "Real Madrid"in üzvü Arda Gülerin də adı keçir. Əgər türk oyunçu satılarsa, klub onun transfer müqaviləsinə geri alma bəndi də əlavə edəcək.

Bundan əlavə, İspaniya mediasında yayılan xəbərlərdə qeyd olunur ki, Arda Güler "Real Madrid"də kifayət qədər meydana çıxmayıb və klubdan ayrılmaq istəyir.
 

Qeyd edək ki, Arda Güler bu mövsüm "Real Madrid" forması ilə 34 oyunda iştirak edib, 3 qol və 7 məhsuldar ötürmə ilə yadda qalıb. Gənc ulduz ümumilikdə 1233 dəqiqə meydanda olub.