Tanınmış səyyahlar Karl Buşbi və Anjela Maksvel “Qoliat” ekspedisiyasının bir hissəsi olaraq Xəzər dənizini sərhəddən-sərhədə üzərək bir ilkə imza atıblar.

Sfera.az xəbər verir ki, dəniz səyahəti Azərbaycan Respublikasının Gənclər və İdman Nazirliyi və Bakı Şəhər Halqası Əməliyyat Şirkətinin dəstəyi və təşkilatçılığı ilə baş tutub. 

Qeyd edək ki, səyahət zamanı iki gənc üzgüçümüz, 15 qat respublika çempionları Anastasiya Boborkina və Abdurrəhman Rüstəmov səyyahlarla birgə gündə 4 saat olmaqla 132 saat üzüblər. Səyahətin ümumi müddəti isə 32 gün olub.

“Xəzər dənizini seçdik, çünki onun əhəmiyyəti və xüsusilə Azərbaycanla Qazaxıstan arasındakı təxmini 300 kilometrlik məsafədən yaranan çətinliklər bunu qaçılmaz etdi. Azərbaycan İdman və Gənclər Nazirliyi ilə Bakı Şəhər Halqasının verdiyi inanılmaz dəstək sayəsində Bakı sahili bu səfərdə əsas rol oynadı”, – K.Buşbi jurnalistlərin suallarını cavablandırarkən bildirib.

Britaniyalı Karl Buşbi və amerikalı Anjela Maksvel dünyanın dörd tərəfini kəşf etməkdə olan tanınmış iki macəraçıdır. Karl bu missiyaya hələ 1998-ci ilin noyabrında 38.000 km-lik məsafəni qət etməklə başlayıb. Həmkarı Anjela Maksvel demək olar ki, son 7 il ərzində 4 qitədə, 14 ölkədə olub, susuz səhraları, başı qarlı dağları gəzərək ümumilikdə 32,186 km məsafəni qət edib.

Bir aya yaxın vaxtdır ki, Aktau yaxınlığındakı sahildən yola çıxan səyyahlar artıq Bakıya çatıblar.

Daha sonra Karl və Anjela Azərbaycan ərazisindən keçərək Avropaya doğru irəliləməyi və səyahətlərini Böyük Britaniyada yekunlaşdırmağı planlayırlar.

Qeyd edək ki, səyyahları “Sea Breeze Resort” İstirahət Mərkəzində idmançılar, dostları və ailə üzvləri, media nümayəndələri qarşılayıblar.

Firuzə Əliyeva