Vulkan katerinin içinə düşən turist ölü tapıldı - FOTO

İndoneziyada aktiv Rinjani Yanardağının kənarında yürüş edən 26 yaşlı braziliyalı turist Juliana Marins 600 metrlik uçurumdan yıxılaraq itkin düşmüşdü. 

Sfera.az “NTV”yə istinadən xəbər verir ki, onun meyiti hadisədən 4 gün sonra tapılıb.

İndoneziya Axtarış və Xilasetmə Agentliyinin rəhbəri Məhəmməd Syafii bildirib ki, Marinsin cansız bədəni 600 metr dərinlikdə aşkarlanıb və ilkin baxış zamanı həyat əlamətləri müşahidə olunmayıb. Axtarış işləri çətin hava şəraiti, palçıqlı zəmin və zəif görünmə səbəbindən ləngiyib. Əraziyə termal kameralarla təchiz olunmuş dronlar cəlb edilib.

Braziliya Xarici İşlər Nazirliyi axtarışların başlanmasından etibarən ölkənin Cakartadakı səfirliyinin yerli qurumlarla sıx əlaqədə olduğunu açıqlayıb. Marinsin ailəsi isə sosial şəbəkədə yayımladığı bəyanatla qızlarının həyatını itirdiyini təsdiqləyib.

Bəsti Rəfizadə
Sfera.az