Tanınmış analitik canlı yayımda huşunu itirdi - VİDEO

ABŞ-nin tanınmış siyasi analitiki və Donald Tramp administrasiyası rəsmisi Kamrin Kinsi, “Fox News @ Night” proqramında canlı yayım zamanı qəfildən huşunu itirərək yerə yıxılıb. Hadisə, o, keçmiş prezident Co Bayden və vitse-prezident Kamala Harris haqqında tənqidi fikirlərini bildirərkən baş verib. 

Sfera.az xarici mediaya istinadən xəbər verir ki, Kinsi cümləsini tamamlamadan öncə nitqində çətinlik çəkib, sonra isə huşunu itirərək oturduğu stuldan yerə yıxılıb.

Proqramın aparıcısı Conatan Hant dərhal reklam fasiləsinə keçərək yardım çağırıb. Los-Ancelesdəki studiyada təcili tibbi yardım əməkdaşları dərhal müdaxilə edərək Kinsini müayinə ediblər. “Fox News” nümayəndəsi onun vəziyyətinin yaxşı olduğunu və səhhətinin stabilləşdiyini bildirib.

Hadisənin səbəbi hələlik açıqlanmayıb, lakin Kinsinin səhhətinin yaxşı olduğu və tezliklə fəaliyyətinə davam edəcəyi gözlənilir.

Bəsti Rəfizadə
Sfera.az