Xəbər verdiyimiz kimi, İmişli rayonu ərazisində ölümlə nəticələnən yol-nəqliyyat hadisəsi baş verib. Hadisə nəticəsində 2 azyaşlı ölüb, əlavə 2 nəfər, o cümlədən YPX avtomobilinin sürücüsü xəsarət alıb. Bir qrup şəxs hadisə yerində xuliqanlıq hərəkətləri törədiblər. Xidməti avtomobilə əlavə zərər vurmaqla hüquq pozuntusu törətməyə cəhd göstərən şəxslər Daxili İşlər Nazirliyi əməkdaşları tərəfindən müəyyən olunaraq saxlanılıblar.

Mövzu ilə bağlı Sfera.az-a açıqlama verən Milli Məclisin deputatı Kamal Cəfərov bildirib ki, sosial şəbəkələrdə yayılan bəzi videolar cəmiyyətdə narahatlıq doğurur:

“Videolarda Dövlət Yol Polisinin qəzaya uğramış avtomobilinə qarşı göstərilən qeyri-adekvat davranışlar açıq şəkildə cinayət tərkibli hərəkətlərdir. Belə hərəkətlər yalnız bir avtomobilə deyil, həm də Azərbaycanın hüquqi və konstitusion quruluşuna, şəhidlərimizin müqəddəs xatirəsinə hörmətsizlik deməkdir. Azərbaycan dövlətinin 1993-cü ilin əvvəlində düşməsinə səbəb olan şəxslər də elə bu təffəkkürdə olub. Hər kəs bilməlidir ki, bu cür davranış, özbaşınalıq elə o zaman da bitib.

Videolarda polis avtomobilinə hücum edən şəxslər qısa müddətdə müəyyən edilib və qanun çərçivəsində məsuliyyətə cəlb olunmasından əlavə, bu hadisə ilə bağlı sosial şəbəkələrdə dövlət əleyhinə çağırışlar edən və ya belə çağırışları yayanlar da hüquq-mühafizə orqanlarının diqqətində olmalı və müvafiq addımlar atılmalıdır.

Dünyanın bu mürəkkəb vaxtında hər bir vətəndaş bu cür halların cəmiyyətdə nifrət və parçalanma yaratmasına imkan verməməli, qanunun aliliyinə və hüquq qaydalarının qorunmasına dəstək olmalıdır.Allah rəhmət eləsin, yaralılara isə tezliklə şəfa diləyirəm. Əminəm ki, bu hadisəyə səbəb olan şəxs və ya şəxslər qanun qarşısında ədalətli cəzalarını alacaqlar”.

Firuzə Əliyeva

Deputatdan polis avtomobilinə hücumla bağlı AÇIQLAMA