Bakıda sanitar təmizlik işləri aparılır - FOTO

Havaların isinməsi ilə Bakı şəhərində sanitar təmizlik və yaşıllaşdırma işləri daha da intensivləşir. Xüsusilə yay fəslində, həm küçə və prospektlərin tozdan təmizlənməsi, həm də ağac və yaşıllıqların suvarılması kimi mühüm tədbirlər Bakı Şəhər İcra Hakimiyyətinin (BŞİH) gündəlik fəaliyyətində önəmli yer tutur. Küçə və yolların yuyulması həm şəhərin estetik görünüşünün qorunması, həm də sakinlərin sağlamlığının təmin olunması baxımından vacibdir. Yayda artan tozlanma, həmçinin şəhərə gələn turistlərin sayının çoxalması da bu tədbirlərin aktuallığını artırır.

Bəs bu istiqamətdə hansı işlər görülür?

Sfera.az xəbər verir ki, Bakı Şəhər İcra Hakimiyyətinin Mətbuat Xidmətindən verilən məlumata əsasən, yaz mövsümündə şəhərin sanitar təmizlik səviyyəsinin daha da yüksəldilməsi məqsədi ilə Bakı Şəhər İcra Hakimiyyəti tərəfindən şənbə günü, iyun ayının 14-də paytaxtda növbəti dəfə genişmiqyaslı təmizlik işləri aparılıb.

Bakı Şəhər İcra Hakimiyyəti Kommunal təsərrüfat xidmətlərinin texnikası əsas küçə və prospektlərin bitki və canlılara ziyansız yuyucu maddələrlə yuyulmasını aparıb. Təmizlik işləri zamanı həm də məhəllədaxili və ara yollar da yuyulub. Xidmətin əməkdaşları tərəfindən prospekt və küçələrin, səki kənarlarının, bordyurların və buradakı işıq dirəklərinin, yol kənarındakı məhəccərlərin, park və istirahət yerlərində oturacaqların yuyulmasını həyata keçirilib, həyət və yaşayış məhəllələrində təmizlik işləri görülüb. İctimai-iaşə, ticarət və digər obyektlərin vitrinlərini təmizlənib, ətrafında səliqə-sahman yaradılıb.

Bakı Şəhər Yaşıllaşdırma Təsərrüfatı Birliyi əməkdaşları tərəfindən əsas magistral yol və prospektlərin kənarlarındakı ağacların üzərinə toplanan toz və torpaq yuyulub, onların dibi yumşaldılıb, ağaclara və yaşıllıq sahələrinə aqrotexniki qulluq göstərilib. Eyni zamanda, şəhər sakinləri və paytaxtımızın qonaqlarının zövqünü oxşayacaq rəngbərəng güllər əkilib, müxtəlif rəngli güllərdən kompozisiyalar yaradılıb.

Yay aylarında Bakı şəhərinə çoxsaylı qonaqların gələcəyini nəzərə alaraq paytaxtın sanitar təmizliyinin lazımı səviyyədə saxlanılması və yaşıllıqların qorunması üçün tələb olunan bütün tədbirlər bütün il ərzində davam etdiriləcəkdir.

Firuzə Əliyeva

Sfera.az