Azərbaycan rayonlarının birində bərk məişət tullantılarının saxlanması və zərərsizləşdirilməsi üçün ayrılan ərazi (poliqon) haqqında mediada yayılan məlumatların həqiqəti əks etdirmədiyi məlum olub.

Sfera.az xəbər verir ki, həmin məlumatda zibil poliqonunun Ağdaş rayonuna məxsus olduğu qeyd edilir.

Xəbərdə bildirilir ki, rayonun Qəribli kəndində böyük "zibillik" poliqonu mövcuddur və burada tullantılar "unudulub", tullantıların idarə edilməsi həyata keçirilmir. Əldə etdiyimiz məlumata əsasən, sözügedən "zibillik" poliqonu coğrafi baxımdan Ağdaş rayonunun Qəribli kəndinin ərazisi ilə əhatə olunsa da buranın idarə edilməsi Ağdaş rayonuna aid deyil.

Bərk məişət tullantılarının saxlanıldığı ərazi Yevlax rayonun inzibati idarəçiliyindədir. Yəni, tullantıların yığılması, daşınması, saxlanılması və zərərsizləşdirilməsi işləri Yexlax rayonunun aidiyyatı qurumları tərəfindən həyata keçirilir.

Sözügedən poliqon 30 ildir ki, mövcuddur. Ağdaşın adıçəkilən kəndinə gedən yol məhz bu poliqonun ərazisindən keçir. Buna görə də bəzi adamlarda elə təsəvvür var ki, bu ərazi də Ağdaş rayonuna aiddir. Amma poliqon Yevlax rayonuna məxsusdur.

O da məlum oldu ki, "zibillik" poliqonu kimi tanınan ərazilər Azərbaycanın bütün rayon və şəhərlərində mövcuddur. Bu xüsusi ərazilər Azərbaycanın müvafiq qanunlarına və Nazirlər Kabinetinin qərarlarına uyğun olaraq yaradılır. Poliqonlar yaşayış məntəqələrində sanitariya, gigiyena və ekoloji vəziyyəti normallaşdırmaq üçün toplanan bərk məişət tullantılarının idarə edilməsi üçün yaradılır. Yaşayış məntəqələrindən toplanan bərk məişət tullantılarının müvəqqəti saxlanılması və zərərsizləşdirilməsi məhz bu ərazilərdə həyata keçirilir. Qaydalara görə, yaşayış məntəqələrindən toplanan bərk məişət tullantılarının xüsusi ayrılan ərazidən başqa yerlərdə saxlanılması, toplanması icazə verilmir, tullantılar bu ərazilərdə zərərsizləşdirilməlidir. Buna görə də bərk məişət tullantılarının saxlanması və zərərsizləşdirilməsi ərazisi seçilən zaman onun yeri tələblərə uyğun olaraq müəyyənləşdirilir.

Tələblərə əsasən, sahənin ərazisi günəş şüaları və küləyin təsiri üçün açıq olmur, qrunt sularının səviyyəsi poliqonun təməlindən ən azı 1 metr aşağı olur, çay, göl, açıq su hövzələrinin sahillərində, kənd təsərrüfatı sahələrinin, şəhərlər və digər yaşayış məntəqələrinin və təbii abidələrin yaxınlığında (sanitar-ekoloji mühafizə zonaları nəzərə alınmaqla), yaşıllıq ərazilərində, turizm və rekreasiya zonalarının ərazilərində və meşələrdə poliqonlar üçün sahələrin ayrılması və təşkili edilmir.

Bu baxımdan Yevlax rayonuna aid olan bərk məişət tullantılarının saxlandığı və zərərsizləşdirildiyi poliqon da tələblərə uyğundur.

Altay

Sfera.az

Ağdaşda zibil poliqonu ilə bağlı məlumatlar həqiqəti əks etdirmir