Tramp 10 milyard dollarlıq iddia üzrə məhkəmə qərarından apellyasiya verib
ABŞ Prezidenti Donald Tramp ailə biznesi ilə bağlı 10 milyard dollarlıq məhkəmə iddiasına dair federal məhkəmənin qərarından apellyasiya şikayəti verib.
Sfera.az xəbər verir ki, bu barədə NBC News məlumat yayıb.
Məlumata görə, Trampın vəkilləri Florida ştatının federal dairə hakimi Ketlin Uilyamsın iyulun 13-də çıxardığı qərardan apellyasiya şikayəti təqdim ediblər. Hakim iddianın "uyğun olmayan məqsədlə" qaldırıldığını və məhkəmə sisteminə təzyiq göstərmək cəhdi kimi qiymətləndirilə biləcəyini bildirib.
İddia Trampın vergi sənədlərinin sızdırılması ilə bağlıdır. Həmin sənədlər sonradan The New York Times qəzetinin Trampın 2016 və 2017-ci illərdə cəmi 750 dollar federal gəlir vergisi ödədiyi barədə dərc etdiyi materialın əsasını təşkil etmişdi.
Trampın hüquq komandası bildirib ki, ABŞ Daxili Gəlirlər Xidməti (IRS) siyasi motivli əməkdaşın prezident, onun ailəsi və The Trump Organization barədə məxfi maliyyə məlumatlarını qanunsuz şəkildə açıqlamasına imkan verib.
Söhbət IRS-in sabiq podratçısından gedir. O, 2023-cü ildə Trampın və minlərlə digər şəxsin 2019–2020-ci illərə aid vergi məlumatlarını oğurlayaraq media orqanlarına ötürdüyünü etiraf edib və buna görə beş il müddətinə azadlıqdan məhrum edilib.
İddianın qaldırılmasından sonra ABŞ Ədliyyə Nazirliyi 1,8 milyard dollarlıq "dövlət qurumlarının siyasiləşdirilməsinə qarşı fond" yaradıb. Bu fond Tramp, onun ailə üzvləri və onlarla əlaqəli şirkətlərlə bağlı müəyyən razılaşmanın bir hissəsi kimi təqdim olunub.
Lakin hakim Ketlin Uilyams bildirib ki, həmin razılaşma tam hüquqi tənzimləmə sayıla bilməz. O, həmçinin vurğulayıb ki, Tramp prezident kimi Ədliyyə Nazirliyi, Maliyyə Nazirliyi və IRS üzərində nəzarət imkanına malik olduğundan burada maraqlar toqquşması yarana bilər.
Məhkəmə həmçinin ABŞ-ın müvəqqəti baş prokuroru Todd Blanş və baş prokurorun müavini Stenli Vudvorda qarşı sanksiyalar tətbiq edib. Bundan əlavə, Florida Vəkillər Kollegiyasından Trampın vəkili Alexandro Brito barəsində intizam tədbirlərinin görülməsi məsələsinə baxılması istənilib.
Bu razılaşma ətrafındakı mübahisə ABŞ Senatında da siyasi gərginlik yaradıb. Respublikaçı senatorlar Con Kornin və Tom Tillis Ədliyyə Nazirliyindən sözügedən fondun bağlanmasını və vergi razılaşmasının şərtlərinin məhdudlaşdırılmasını tələb ediblər.
Donald Tramp isə cümə günü jurnalistlərə açıqlamasında fondun faktiki olaraq bağlandığını desə də, "Mən bunun baş verməməsini üstün tutardım" ifadəsini işlədib. Prezident özünə, ailəsinə və şirkətinə aid vergi razılaşmasının şərtlərini dəyişməyə hazır olub-olmaması ilə bağlı sualı isə cavabsız qoyub.
Firuzə Əliyeva
Sfera.az
