ABŞ-ın Los-Anceles şəhərindən Meksikanın Puerto Vallarta şəhərinə bir həftəlik səyahət zamanı 3914 sərnişindən 134-ü, eləcə də yeddi ekipaj üzvü qəfildən xəstələnib.

Sfera.az bildirir ki, epidemiyanın səbəbi hələ müəyyən edilməyib.

ABŞ-ın Xəstəliklərə Nəzarət və Qarşısının Alınması Mərkəzləri Meksikaya gedən “Royal Caribbean” kruiz gəmisində bağırsaq infeksiyasının baş verdiyini təsdiqləyib. 140-a yaxın insan qusma və ishaldan əziyyət çəkir.

Xəstəliyin ilk xəbərlərindən sonra heyət gəmidə dezinfeksiya və təmizliyi artırıb. Xəstə sərnişinlər təcrid edilib.

Norovirusun yayılması

Qeyd edək ki, Xəstəliklərə Nəzarət və Qarşısının Alınması Mərkəzləri (CDC) əvvəllər sərnişinlər arasında yoluxucu mədə-bağırsaq xəstəlikləri riskini artıra biləcək yeni norovirus ştamının yayılması barədə xəbərdarlıq etmişdi.

Fevral ayından bəri agentlik kruiz gəmilərində mədə-bağırsaq xəstəliklərinin 18 epidemiyasını sənədləşdirib, əksər hallarda infeksiyanın əsas səbəbi norovirusdur.

"Kruiz gəmilərində son hadisələrin sayı pandemiyadan əvvəlki illərlə müqayisədə daha yüksək olub, lakin yeni bir xəstəlik dalğasının yolda olub-olmadığını deyə bilmərik"- “CDC”nin aprel ayında verdiyi bəyanatda deyilir.

Xatırladaq ki, bu kruiz gəmilərində ilk kütləvi xəstəlik halı deyil. Bu ayın əvvəlində Rusiyanın "Nikolay Karamzin" kruiz gəmisində də bağırsaq infeksiyası epidemiyası qeydə alınıb və 36 sərnişin zərər çəkib.

Aysel

Kruiz gəmisində qalmaqal: 140 sərnişin müəmmalı xəstəliyə yoluxdu