Süveydada ölənlərin sayı artır - Son rəqəmlər
Suriya İnsan Haqları Şəbəkəsi (SNHR) ölkənin cənubunda yerləşən Süveyda vilayətində son günlər baş verən silahlı qarşıdurmalar nəticəsində azı 321 nəfərin həyatını itirdiyini açıqlayıb. Qurumun məlumatına görə, 13–18 iyul tarixlərini əhatə edən dövrdə baş verən döyüşlərdə 436-dan çox insan da yaralanıb.
Sfera.az xarici mediaya istinadən xəbər verir ki, qarşıdurmalar vilayətin qərb və şimal bölgələrində Bədəvi ərəblər və müxtəlif qəbilə qüvvələrinin yaratdığı ittifaqla bəzi Dürzi silahlı qruplar arasında davam edir.
Münaqişə iyulun 13-də kiçik miqyaslı silahlı toqquşmalarla başlayıb. Gərginliyin artması səbəbindən bölgəyə Suriya təhlükəsizlik qüvvələri göndərilib. Lakin bəzi Dürzi qruplarının bu qüvvələrə hücumları nəticəsində onlarla əsgər həlak olub.
Atəşkəs razılaşması əldə olunsa da, qısa müddət sonra pozulub. İyulun 16-da İsrail Hərbi Hava Qüvvələri Suriyanın təhlükəsizlik strukturlarını hədəf alan hücumlar həyata keçirib. Hədəflər arasında Prezident Administrasiyası, Baş Qərargah və Müdafiə Nazirliyi də olub.
Elə həmin gün hökumət qüvvələri ilə yerli silahlı qruplar arasında ikinci atəşkəs razılaşması əldə edilib. Lakin bundan bir müddət sonra bəzi Dürzi silahlı qruplar Bədəvi ərəbləri zorla öz ərazilərindən çıxarmağa başlayıb. Bu isə qarşıdurmaların yenidən alovlanmasına səbəb olub. Qeyd olunur ki, bu dəfə təhlükəsizlik qüvvələri hadisələrə müdaxilə etməyib.
SNHR və yerli mənbələr yüzlərlə insanın həm qarşıdurmalar, həm də İsrailin hava hücumları nəticəsində öldüyünü bildirir. Hazırda Süveydada vəziyyət son dərəcə ağırdır. Əhalinin qida, su və elektrik enerjisinə çıxışı kəsilib. Bölgədə ciddi humanitar böhran yaşanır.
Bəsti Rəfizadə
Sfera.az
