ABŞ Prezidenti Donald Tramp Kaliforniya ştatında illərdir davam edən sürətli qatar layihəsinin dayandırıldığını elan edib. O, layihəni “faydasız, həddindən artıq baha və nəzarətlərlə yüklənmiş” adlandıraraq, layihəyə ayrılmış milyardlarla dollarlıq federal vəsaitin geri çəkildiyini bildirib.

Sfera.az xəbər verir ki, Tramp “Truth Social” sosial şəbəkəsində paylaşdığı açıqlamasında deyib:

“Kaliforniyanın heç bir yerə getməyən, fəlakətli dərəcədə baha başa gələn sürətli qatar layihəsi üçün maliyyələşdirməni dayandırdığımı bildirməkdən böyük sevinc duyuram”.

O, layihənin Kaliforniya Qubernatoru Qavin Nyusomun “yetersizliyi” nəticəsində bu vəziyyətə gəldiyini iddia edib və ABŞ vətəndaşlarının bu layihə səbəbilə yüz milyardlarla dollar itirdiyini vurğulayıb.

ABŞ Nəqliyyat Nazirliyindən verilən açıqlamada isə Federal Dəmir Yolu Administrasiyasının layihəyə ayrılan təxminən 4 milyard dollarlıq fondu dayandırdığı bildirilib. Qeyd olunub ki, son 16 ildə layihəyə ümumilikdə 15 milyard dollar xərclənsə də, hələ də heç bir sürətli qatar xətti tikilməyib.

Kaliforniya Qubernatoru Qavin Nyusom isə qərarın qanunsuz olduğunu deyərək etiraz edib. O, layihə çərçivəsində bəzi qatar xətlərinin tikilməkdə olduğunu və federal hökumətin maliyyəni kəsməsinin hüquqi əsaslara söykənmədiyini bildirib.

Qubernator həmçinin qeyd edib ki, Kaliforniya bu qərara qarşı hüquqi yollarla mübarizə aparacaq:

“Biz Trampın gələcəyimizi Çinə təslim etməsinə icazə verməyəcəyik”.

Hadisə ABŞ-də dövlət investisiyaları və infrastruktur layihələri ətrafında davam edən siyasi mübahisələri bir daha gündəmə gətirib.

Bəsti Rəfizadə
Sfera.az

Qubernator Trampı məhkəməyə verəcək - Mübahisə bu məsələyə görə yaranıb