İran Avropaya çağırış etdi: “İsrailin təcavüzünə qarşı ədalətli mövqe sərgiləyin”

İranın xarici işlər naziri Abbas Əraqçi Avropa ölkələrini İsrailin bölgədəki təcavüzkar davranışlarına qarşı məsuliyyətli və ədalətli mövqe nümayiş etdirməyə çağırıb.

Sfera.az xəbər verir ki, İranın rəsmi IRNA agentliyinin məlumatına görə, Əraqçi bu fikirləri Polşanın xarici işlər naziri Radoslav Sikorski ilə telefon danışığı zamanı səsləndirib. O, İsrail və ABŞ-nin İranın nüvə obyektlərinə qarşı hücumlarını kəskin tənqid edib, Avropa ölkələrinin isə bu hücumlara səssiz qalmasını “ikili standart” adlandırıb.

Nazir bildirib ki, bu hücumlar Nüvə Silahlarının Yayılmasının Qarşısının Alınması Müqaviləsini (NPT), BMT Təhlükəsizlik Şurasının və MAQATE-nin qərarlarını açıq şəkildə pozur. Əraqçiyə görə, bu cür hərəkətləri dəstəkləyən və ya görməzlikdən gələn ölkələr də məsuliyyət daşıyır.

Bəsti Rəfizadə
Sfera.az