İtaliyada 6 avroya 6 ev aldı: Nə etməyi planlaşdırır? - FOTOLAR
ABŞ-ın San-Fransisko şəhərindən olan 51 yaşlı planlaşdırma üzrə məsləhətçi Rubiya Daniels İtaliyanın mənzərəli Mussomeli şəhərində altı tərk edilmiş evin hər birini təxminən 1 avroya almaqla qeyri-adi sərmayə qoyub.
Sfera.az bildirir ki, bu addım tərk edilmiş əmlakların bərpasına və yeni sakinlərin cəlb edilməsinə yönəlmiş yerli təşəbbüslə mümkün olub.
Rubiyanın dostları əvvəlcə onun belə sərfəli alış haqqında hekayəsinə inanmayıblar. Ancaq 2019-cu ildə qadın əri və qaynı ilə birlikdə sənədləri tamamlamaq və iddialı bir layihəyə başlamaq üçün İtaliyaya gedib. Ümumilikdə o, inzibati rüsumlara və agentlik xidmətlərinə təxminən 22,600 avro xərcləyib.
Alınan evlər müxtəlif dərəcədə dağılmışdı: bəziləri damlarını və əsas kommunal xidmətlərini itirmişdi. Bununla belə, Rubiyanın planlaşdırma üzrə məsləhətçi kimi çoxillik təcrübəsi ona öz qabiliyyətlərinə inam qazandırıb.
Tamamilə dağılmış birinci ev artıq tam bərpa olunub. Rubiyanın dediyinə görə, indi möhtəşəm mərmər yataq otağı var. Təmir təxminən 56 655 avroya başa gəlib və qadın ümid edir ki, növbəti 50 il ərzində əlavə işə ehtiyac olmayacaq.
Rubiyanın planları təkcə yaşayış binaları ilə məhdudlaşmır. O, altı obyektdən birini yoqa və meditasiya dərsləri ilə sağlamlıq mərkəzinə çevirməyi planlaşdırır. Onun hesablamalarına görə, digər evlərin təmiri birincidən xeyli az başa gələcək.
Peşəkar təcrübəsi sayəsində Rubiya yenidənqurmaya şəxsən nəzarət edir və ailəsini işə cəlb edir. O, həmçinin yerli materiallardan və xidmətlərdən istifadə etməyə çalışır.
Rubiyanı təkcə aşağı əmlak qiymətləri deyil, həm də Mussomelidəki rahat həyat tərzi cəlb edirdi.
"Heç kim tələsmir, hər şey əlçatandır. Qəhvə və kruassanın qiyməti 1,50 avrodur. Kaliforniya çox gərgin yerdir və hər şey çox səthidir” - deyə o qeyd edib.
İndi Rubiyanın 70 və 82 yaşlı iki xalası təqaüdə çıxmaq üçün Mussomeliyə köçməyi planlaşdırır. Bu təşəbbüs sayəsində bir vaxtlar az tanınan Siciliya şəhəri beynəlxalq diqqəti cəlb edir. Qadının sözlərinə görə, onun evlərindən birinə artıq 30-a yaxın potensial alıcı baxır.
Aysel
