İngiltərədə könüllü ölüm qanuniləşdirilir
İngiltərədə ölümcül xəstə olan yetkin şəxslərin həyatlarına qanuni şəkildə son qoymalarına imkan verən qərar ilə bağlı ətraflı təsir qiymətləndirməsi dərc olunub.
Sfera.az NTV nəşrinə istinadən xəbər verir ki,“Ölümcül Xəstə Yetkinlər (Ömrün Sonu)” adlı qanun layihəsinə əsasən, xidmətin ilk ilində 273-dən 1,311 nəfərədək insanın köməkli ölüm üçün müraciət edə biləcəyi proqnozlaşdırılır.
Hesabata görə, növbəti 10 il ərzində bu göstəricinin 4,500 nəfəri keçəcəyi gözlənilir. Layihə çərçivəsində yaradılacaq Könüllü Yardımlı Ölüm Müvəkkilinin illik xərclərinin 10,9 milyon funt sterlinqdən 13,6 milyon funt sterlinqə qədər olacağı ehtimal edilir.
Qiymətləndirmədə həmçinin qeyd olunub ki, köməkli ölüm xidmətinin tətbiqi nəticəsində ömrünün sonuna qədər davam edən tibbi xidmətlər üzrə xərclər ilk il üçün təxminən 10 milyon funt sterlinq, 10 ildən sonra isə 60 milyon funt sterlinq azala bilər. Lakin vurğulanır ki, bu qənaət siyasətin məqsədi kimi nəzərdə tutulmur.
Qanun layihəsi 2024-cü il oktyabrın 16-da deputat Kim Leadbeater tərəfindən parlamentə təqdim olunub. Layihəyə əsasən, İngiltərə və Uelsdə yaşamaq üçün altı aydan az vaxtı qalan ölümcül xəstələr köməkli ölüm hüququndan istifadə edə biləcəklər.
İlkin səsvermədən sonra layihəyə edilən dəyişikliklər Ali Məhkəmənin prosesə müdaxiləsini aradan qaldırıb. Qərar artıq iki həkimin və tibbi-hüquqi ekspertlərdən ibarət xüsusi bir heyətin razılığı ilə veriləcək. Bu dəyişiklik qərar prosesini daha çevik və şəffaf etməyi hədəfləyir.
Fidan Hacızadə
Sfera.az
