Sakit Okean ada dövləti Samoa sakinləri həftələrdir ki, bütün kəndləri qaranlığa qərq edən və müəssisələrdə böyük fasilələrə səbəb olan elektrik enerjisinin kəsilməsi ilə mübarizə aparırlar.

Sfera.az bildirir ki, Samoa kurort adası qaranlığa qərq olub. Ağ çimərlikləri ilə məşhur olan Samoa adalarında günlərlə elektrik enerjisi olmadığı üçün sakinlər şkaflarından şam və kerosin lampaları çıxarmalı olurlar.

Turistlərin ağ qumlu çimərliklərinə üz tutduğu ölkənin ən sıx məskunlaşdığı adası Upoluda bəzi sakinlər gecələr kerosin lampalarından istifadə etməyə qayıdıb və ərzaq saxlamaqda çətinlik çəkirlər.

Paytaxt Apiada yaşayan bir sakin, işıqların kəsilməsinin ailəsini uyğunlaşmağa və şamdan və günəş enerjisi ilə işləyən fənərlərdən istifadə etməyə məcbur etdiyini bildirir.

Baş nazir Fiame Naomi Mata'afa, enerji böhranının ev təsərrüfatları, müəssisələr və əsas xidmətlər üçün yaratdığı çətinliyi etiraf edərək, bazar ertəsi günü 30 günlük fövqəladə vəziyyət elan edib.

Sakit okeanı bürüyən siklonlar səbəbindən tez-tez fasilələrlə üzləşən Samoanın 215 000 sakini üçün elektrik enerjisinin kəsilməsi qeyri-adi deyil. Ancaq adada elektrik enerjisinin kəsilməsinin bu qədər uzun müddət təkrarlandığını görmək nadirdir.

Rəsmilər bunun bir çox səbəbinin olduğunu deyirlər: elektrik stansiyasındakı mexaniki nasazlıqlar, yeraltı kabellərin nasazlığı, son fırtınanın böyük ziyanı və son iki ildə elektrik enerjisinə tələbatın əhəmiyyətli dərəcədə artması.

Hökumətin elektrik enerjisi təchizatçısı Elektrik Enerjisi Korporasiyası, üç əsas generatorun sıradan çıxmasından sonra, martın 16-dan etibarən Upoluda enerji norması tətbiq etmək məcburiyyətində qalıb.

Baş nazir böhranın ümumi daxili məhsulun (ÜDM) azalmasına səbəb ola biləcəyi barədə xəbərdarlıq edib və mağazalarda akkumulyatorla işləyən əşyalar, həmçinin şam və kerosin lampaları satılıb.

"Biz kiçik adalarıq - cəmi 200.000 əhalimiz var və biz sadəcə lampa dövrünə qayıdırıq"-deyə yerlilər bildirirlər.

Aysel

Sakit Okean kurort adası enerji fəlakətinin astanasında