Kolumbiya prezidenti Qustavo Petro kokainin leqallaşdırılması məsələsi ilə bağlı debat açıb.

Sfera.az bildirir ki, Qustavo Petro ölkəsində qaçaqmalçılığı ilə məşhur olan kokainlə bağlı qalmaqallı açıqlama verib. Kolumbiya prezidenti uzun nitqinin bir hissəsində kokainin viskidən pis olmadığını açıq şəkildə ifadə edərək ölkədə müzakirələrə səbəb olub.

Qustavo Petro bu barədə Nazirlər Şurasının Boqotadakı prezident sarayında, “Casa de Narino”da baş tutan iclasında bildirib. Prezidentin sərəncamı ilə görüş canlı yayımlanıb.

Dövlət başçısının bu mövqeyi, şübhəsiz ki, ölkənin müxtəlif siyasi dairələrində, xüsusən də Petro hökumətinin narkotiklərlə mübarizəsi ilə bağlı şərhlər dalğasına səbəb olacaq. Çünki nə qədər qəribə olsa da, Petro administrasiyasının siyasəti böyük narkobaronların qeyri-qanuni iqtisadiyyatına hücum etməkdir.

O, həmçinin siqaretdən daha təhlükəli olan vapinqdən istifadənin də qanuni olduğunu bildirib. Daha sonra prezident kokainə keçib.

"Beləliklə, kokain Latın Amerikasında istehsal olunduğu üçün qadağan edilib. Viskidən betər olduğuna görə yox. Alimlərin təhlil etdiyi budur. Kokain viskidən pis deyil" - deyən Petro, fentanilin amerikalıları "öldürdüyünü", lakin Kolumbiyada istehsal olunmadığını qeyd edib.

O xatırladıb ki, fentanil Şimali Amerika transmilli korporasiyaları üçün əczaçılıq preparatı olub, lakin onun yüksək dərəcədə asılılıq yaratdığı üzə çıxanda qadağan edilib.

"Deməli, indi bu, meksikalıların günahıdır? Bəli, əlbəttə” - deyə Kolumbiya prezidenti ABŞ-dakı problemlərə eyham vuraraq bildirib.

Onu da qeyd edək ki, keçmiş partizan Qustavo Petro Kolumbiyadakı silahlı qruplarla sülh danışıqları aparmaq vədi ilə prezidentliyə namizəd olub.

Ancaq indi analitiklər deyirlər ki, bu səylər Kolumbiya ilə onun ən mühüm müttəfiqi olan ABŞ arasında münasibətləri təhlükə altına sala bilər. ABŞ prezidenti Donald Trampın müttəfiqləri Petronun sülh danışıqlarını və onun kokain ticarətinə nəzarət edə bilməməsini tənqid edirlər. Ötən ay Kolumbiya prezidenti Petronun deportasiya uçuşları ilə bağlı Trampla mübahisəsi az qala iki ölkə arasında ticarət müharibəsinə səbəb olanda böhranla üzləşib.

Xanım

“Kokain viskidən pis deyil": Kolumbiya prezidentindən şok bəyanat