Türkiyə 13 yaşdan aşağı uşaqlara məhdudiyyət tətbiq edə bilər

Türkiyə hakimiyyəti 13 yaşınadək uşaqların sosial şəbəkələrdən istifadəsinə qadağa qoyulmasını müzakirə edir.
 

Sfera.az bildirir ki, bu barədə yerli NTV telekanalı xəbər yayıb.

Türkiyənin İnformasiya Texnologiyaları və Kommunikasiya İdarəsinin (BTK) rəis müavini Abdulkerim Gün efirdə deyib: “Biz 13 yaşından kiçik uşaqların sosial şəbəkələrə girişinə qadağa qoyulması üzərində işləyirik, belə bir təkliflə çıxış edəcəyik”.
 

Eyni zamanda, Yetkinlik yaşına çatmayanların işləri üzrə departamentin rəhbəri Eda Şirnevai bildirib ki, ölkə parlamenti 13 yaşından kiçik uşaqların smartfonlardan istifadəsinə qadağa qoyulmasını müzakirə edir. Qadağanın tətbiqi mexanizminin təfərrüatları hələlik açıqlanmayıb.
 

Xəbər verdiyimiz kimi, Avstraliyada 16 yaşdan kiçik uşaqların sosial mediadan istifadəsinə qadağa Senat tərəfindən cümə axşamı təsdiq edilib və bir ildən sonra qüvvəyə minəcək. Bu, Avstraliyanı dünyada belə sərt məhdudiyyət tətbiq edən ilk ölkə edir.
 

Oxşar qadağalar bütün ölkədə olmasa da, ABŞ-də də qüvvədədir. Məsələn, Florida ştatında 14 yaşından kiçik uşaqlar üçün Instagram və Facebook kimi platformalara giriş qadağandır, Yuta ştatında isə 18 yaşından kiçik uşaqlar üçün valideyn nəzarəti tələb olunur.
 

Noyabrın əvvəlində Rusiya Federasiyasının Dövlət Duması 14 yaşından kiçik uşaqlar üçün oxşar qadağanın tətbiqi təklifini dəstəkləməyib. Rusiya Radiosunda AVANTİ sahibkarlar assosiasiyasının biznes vətənpərvərliyini inkişaf etdirmək təşəbbüsünü şərh edən hüquqşünas, Xalq Cəbhəsinin nümayəndəsi Yuliya Dubinina qeyd edib ki, belə bir qadağaya əməl olunmasına nəzarət etmək mümkün olmayacaq.

İnci