“Instagram” və “Facebook”da yaranan texniki problemlər artıq aradan qaldırılıb. “Meta” şirkəti xüsusilə “Facebook”da yaranmış nasazlığı texniki problemlərlə izah edib.

Şirkət bu gün texniki problemlər səbəbindən istifadəçilərin bəzi xidmətlərə daxil olmaqda çətinlik çəkdiyini təsdiqləyib. 

Sfera.az bildirir ki, bu barədə “Meta”nın nümayəndəsi Endi Stoun X mikrobloqlar xidmətindəki qeydində bildirib.

O qeyd edib ki, bu gün texniki maneələr səbəbindən istifadəçilər şirkətin bəzi xidmətlərindən istifadə etməkdə çətinlik çəkirlər. Onun sözlərinə görə, problem yaşayan hər kəs üçün texniki problemləri mümkün qədər tez həll etməyə çalışıblar.

"Yaranmış problemin səbəb olduğu hər hansı narahatlığa görə üzr istəyirik" - deyə Stoun bildirib.

Qeyd edək ki, bu gün Bakı vaxtı ilə təqribən 19:30 radələrində “Facebook” və “Instagram” çöküb. 

“Facebook” və “Instagram”da kütləvi fasilə yaranıb. Qəza və şikayət detektoru “DownDetector”un məlumatına görə, Youtube, X (Twitter), Google və digər xidmətlərin istifadəçiləri də bəzi problemlərlə üzləşiblər.

“Threads” sosial şəbəkəsi isə demək olar ki, tamamilə sıradan çıxıb. Tətbiqi açarkən "Bağışlayın, nəsə səhv oldu. Yenidən cəhd edin" xəta mesajı göstərilib. Buna baxmayaraq, “Meta”ya məxsus olan WhatsApp messencerində heç bir problem yaşanmayıb,tətbiq normal qaydada işləyib. 

“Telegram” messencerinin təsisçisi Pavel Durov “Instagram” və “Facebook” sosial şəbəkələrində  baş vermiş uğursuzluğu şərh edib. Onun sözlərinə görə, bu sosial şəbəkələrin işləməməsinə görə milyonlarla insan “Telegram”dan istifadə edib. Durov həmçinin bildirib ki, ötən il “Telegram”da ilin 525 600 dəqiqəsindən cəmi 9 dəqiqəsi problemli olub.

Xanım

Sfera.az