“Xiaomi” yeni telefonunu təqdim etdi
“Xiaomi” Yaponiyada keçirilən təqdimatda “Redmi Note 17 Pro Max 5G” modelini rəsmi olaraq nümayiş etdirib.
Sfera.az xəbər verir ki, yeni smartfon həm “Redmi Note” seriyasının ilk “Pro Max” modeli, həm də şirkətin indiyədək ən böyük batareya tutumuna malik telefonu kimi təqdim olunub.
Smartfonun əsas üstünlüklərindən biri 10000 mAh tutumlu silikon-karbon batareyadır. İstehsalçının məlumatına görə, cihaz bir dəfə tam doldurulduqdan sonra 3 günə qədər istifadə imkanı verir.
Model 100 Vt sürətli şarj texnologiyasını dəstəkləyir. “Xiaomi”nin açıqlamasına əsasən, cəmi 20 dəqiqəlik şarjla bir günlük istifadə üçün kifayət qədər enerji toplamaq mümkündür. Bundan əlavə, cihaz 27 Vt gücündə naqilli əks şarj funksiyasına malikdir. Bu xüsusiyyət vasitəsilə digər smartfon və elektron cihazları da enerji ilə təmin etmək mümkündür.
“Redmi Note 17 Pro Max 5G” davamlılıq baxımından da iddialıdır. Telefon IP66 və IP68 sertifikatları ilə qorunur. Şirkət cihazın 2 metr dərinlikdə suda 72 saata qədər qala bildiyini, həmçinin 3 metr hündürlükdən düşmələrə qarşı davamlı olduğunu bildirib.
Smartfonun ekranı 6,83 düym ölçüsündədir. 1,5K təsvir ölçüsünə və 120 Hz yenilənmə tezliyinə malik ekran yüksək parlaqlıq göstəricisi ilə təqdim olunur.
Cihazın performansını “Qualcomm Snapdragon 6 Gen 5” prosessoru təmin edir. Kamera bölməsində isə optik görüntü sabitləşdirmə (OIS) texnologiyasına malik 50 MP əsas kamera yer alır.
Yeni model “HyperOS 3” əməliyyat sistemi ilə işləyir. Sistemə müxtəlif süni intellekt funksiyaları əlavə olunub və istifadəçilərə uzunmüddətli proqram təminatı yeniləmələri vəd edilib.
“Redmi Note 17 Pro Max 5G” üç fərqli rəng variantında satışa çıxarılıb. 256 GB yaddaşa malik versiyanın qiyməti təxminən 502 dollar, 512 GB-lıq model isə təxminən 628 dollar təşkil edir.
Beləliklə, “Xiaomi” yeni modeli ilə xüsusilə batareya tutumu və davamlılıq baxımından smartfon bazarında fərqli mövqe tutmağa çalışıb.
Bəsti Rəfizadə
Sfera.az
