Yuxu uşaqlar üçün ekran vaxtından daha vacibdir – YENİ TƏDQİQAT

Keyfiyyətli yuxu yeniyetmələrin məktəb uğuru və sosial həyatı üçün qidalanma və idmandan daha vacibdir.

Sfera.az xəbər verir ki, ABŞ-nin Kaliforniya Universitetində Davis alimlərinin apardığı yeni araşdırmaya görə, keyfiyyətli yuxu yeniyetmələrin məktəbdəki nailiyyətlərinə və sosial münasibətlərinə ekran qarşısında keçirdikləri vaxtdan, fiziki aktivlikdən və qidalanmadan daha güclü təsir göstərir.

Tədqiqat çərçivəsində 10–13 yaş arasında olan 6 mindən çox uşağın akademik göstəriciləri, 7 mindən çox iştirakçının isə sosial davranışları təhlil edilib.

Nəticələr göstərib ki, depressiya, narahatlıq və digər psixi sağlamlıq problemlərinin əlamətləri olan uşaqlar məktəbdə daha zəif nəticələr göstərir və sosial münasibətlərdə daha çox çətinlik yaşayırlar. Lakin alimlər hesab edirlər ki, bu əlaqənin əsas səbəblərindən biri məhz yuxu keyfiyyətidir.

Tədqiqatın ilk müəllifi Ceyson Smuçni bildirib ki, yuxunun vacibliyi gözlənilən olsa da, onun ekran vaxtı, idman və qidalanmanı bu qədər açıq şəkildə geridə qoyacağı gözlənilmirdi.

Alimlərin fikrincə, yuxusuzluq gün ərzində yorğunluğa, diqqət pozğunluğuna və düşünmə qabiliyyətinin zəifləməsinə səbəb olur ki, bu da təhsil göstəricilərinə birbaşa təsir edir. Eyni zamanda, keyfiyyətsiz yuxu əsəbilik və sosial təcrid hissini gücləndirərək yeniyetmələrin dostluq münasibətlərini də çətinləşdirə bilər.

Araşdırmanın müəlliflərindən Tara Niendam vurğulayıb ki, sağlam yuxu rejimi psixi sağlamlıq problemlərini tam aradan qaldırmasa da, valideynlərin uşaqlarının emosional vəziyyətini və gündəlik fəaliyyətini dəstəkləməsi üçün ən praktik vasitələrdən biridir.

İnci

Sfera.az