22 iyul - Milli Mətbuat Günüdür
22 iyul Azərbaycanda Milli Mətbuat Günüdür. Bu əlamətdar tarix münasibətilə Azərbaycan milli mətbuatının yaranmasının 151-ci ildönümü qeyd olunur.
Sfera.az xəbər verir ki, Azərbaycan milli mətbuatının əsası 1875-ci il iyulun 22-də görkəmli maarifçi Həsən bəy Zərdabi tərəfindən nəşr edilən “Əkinçi” qəzeti ilə qoyulub. Cəmi 56 sayı işıq üzü görməsinə baxmayaraq, “Əkinçi” xalqın maariflənməsi, milli özünüdərk hissinin güclənməsi və ana dilində mətbuatın formalaşması baxımından tarixi rol oynayıb. Xalqın milli oyanışında, maariflənməsində və ictimai şüurun formalaşmasında müstəsna rol oynamış "Əkinçi" qəzeti çətin şəraitdə fəaliyyət göstərsə də, qısa müddətdə cəmiyyətin güzgüsünə çevrilib.
Mirzə Fətəli Axundzadə, Seyid Əzim Şirvani kimi dövrün görkəmli ziyalılarının əsərlərinin işıq üzü gördüyü bu nəşr, Azərbaycan jurnalistikasının təməl daşını qoydu. 1991-ci ildən etibarən 22 iyul Azərbaycanda rəsmi olaraq Milli Mətbuat Günü kimi qeyd edilir. Bu gün ölkədə jurnalistika ənənələrinin yaşadılması, peşəkar medianın inkişafı və söz azadlığının əhəmiyyəti bir daha vurğulanır. 151 illik inkişaf yolu keçən Azərbaycan mətbuatı müxtəlif tarixi mərhələlərdən keçərək cəmiyyətin informasiya təminatında, ictimai rəyin formalaşmasında və milli dəyərlərin təbliğində mühüm rol oynayıb. Bu gün ənənəvi media ilə yanaşı, rəqəmsal media da informasiya məkanının ayrılmaz hissəsinə çevrilib. Bu gün rəqəmsal dünyanın tələblərinə uyğun olaraq inkişaf edən Azərbaycan mediası cəmiyyətin obyektiv məlumatlandırılması istiqamətində mühüm addımlar atır. Qlobal informasiya məkanında baş verən proseslərin operativ şəkildə işıqlandırılması, milli maraqların qorunması və həqiqətin oxucuya çatdırılması hər zaman medianın əsas prioritetləri olaraq qalır.
Bəsti Rəfizadə