İnsanlar istirahət üçün ən çox bu ayı seçir - TƏDQİQAT

Yay aylarında insanların istirahətə çıxma meyli artsa da, statistik göstəricilər və araşdırmalar avqust ayının istirahət üçün ən çox seçilən dövr olduğunu ortaya qoyur.

Sfera.az xəbər verir ki, araşdırmalara əsasən, avqust ayı məktəbli və tələbələrin yay tətilinin ortasına təsadüf etdiyindən valideynlərin səfər planlamasında üstünlük verdiyi aydır. Eyni zamanda, bir çox dövlət və özəl müəssisələr məzuniyyətləri məhz bu aya planlaşdırır. Bu da avqustu kollektiv istirahət üçün ideal dövrə çevirir.

İsti hava şəraiti, günəşli günlərin çoxluğu və dəniz mövsümünün ən pik vaxtı olması da insanların bu ayı seçməsində mühüm rol oynayır. Avropa ölkələrində, xüsusilə İtaliyada “Ferragosto” adlandırılan avqustun ortası milli istirahət dövrü kimi qəbul olunur. Fransada isə paytaxt Parisdə bir çox mağaza və restoranlar bu səbəblə bağlanır.

Psixoloqlar bu tendensiyanı “yay tənbəlliyi” effekti ilə izah edir. Onların fikrincə, avqust ayı insanlar üçün həm fiziki, həm də zehni olaraq dincəlmək üçün ən uyğun dövrdür. Sosial şəbəkələrdə həmin ayda istirahətlə bağlı paylaşımların artması da bu prosesi stimullaşdıran amillər sırasındadır.

“Harvard Business Review”un yay davranışları ilə bağlı apardığı araşdırmaya görə, insanların 41 faizi məzuniyyət üçün avqust ayını seçir və bu ayda dincələnlərin əksəriyyəti özlərini emosional cəhətdən daha rahat hiss etdiklərini bildirir.

Fidan Hacızadə
Sfera.az