Bitməyən cinayətlər - "Onlar tədbir görməlidir"
Ölkədə bıçaqla törədilən cinayətlərin sayı artmaqda davam edir. Demək olar ki, hər gün bu qəbildən yeni bir hadisə qeydə alınır. Məişət zəminində baş verən mübahisələr və gənclər arasında zorakılığa meyl bu halların əsas səbəblərindəndir.
Bu cür halların sayını azaltmaq üçün nə edilməlidir?
Sözügedən məsələ ilə bağlı Sfera.az-a açıqlama verən "Polisə Dəstək” İctimai Birliyinin rəhbəri Şəmsəddin Əliyev bildirib ki, Ailə, Qadın və Uşaq Problemləri üzrə Dövlət Komitəsi məişət zorakılığı, fiziki və psixoloji şiddət halları ilə bağlı daha ciddi və sistemli tədbirlər görməlidir:
“Komitənin regionlarda nümayəndəlikləri və müxtəlif şöbələri mövcuddur ki, bu da sektorlar üzrə problemlərin təhlilinə imkan yaradır. Əgər ölkə üzrə ildə 100-200 arası məişət zorakılığı faktı qeydə alınırsa, onların səbəblərini və hansı şəraitdə baş verdiyini öyrənmək o qədər də çətin deyil. Bu məqsədlə interaktiv sorğular vasitəsilə bir neçə ailə seçilərək təhlil aparıla bilər. Hadisələrin mənbəyi müəyyən edildikdən sonra isə münasib tədbirlər təklif olunaraq zorakılıq hallarının qarşısının alınması mümkün olar”.
O qeyd edib ki, komitə bu istiqamətdə kifayət qədər geniş fəaliyyətlər həyata keçirməlidir:
“Bu prosesdə daxili qurumların, xüsusən də Səhiyyə Nazirliyi və digər aidiyyəti strukturların akademik yanaşma ilə iştirakı işin səmərəliliyini artırar.
Məişət zorakılığı ilə bağlı mühafizə orderlərinin verilməsində müəyyən problemlər mövcuddur. Qısamüddətli orderləri icra hakimiyyəti, uzunmüddətli orderləri isə məhkəmələr verir. Hər iki halda icra hakimiyyəti, polis və müvafiq komissiyaların təqdim etdiyi sənədlər əsasında tədbirlər görülür. Bu isə güc strukturlarının birgə fəaliyyətini zəruri edir. Lakin səlahiyyətlərin müxtəlif qurumlar arasında bölüşdürülməsi bəzən çevik və operativ reaksiya verməyə imkan vermir. Nəticədə ailədə baş verən zorakılıq və hətta intihar halları belə diqqətdən kənarda qala bilir”.
Ş.Əliyev məsələnin kökündə ailədə baş verən zorakılıqların və onlardan yaranan səbəblərlə bağlı konkret informasiya və vahid konsepsiyanın olmamasının dayandığını əlavə edib:
“Hazırda bu istiqamətdə milli fəaliyyət planı mövcud deyil. Ona görə də belə hallar davam edir. Ailə cəmiyyətin əsas nüvəsi, təməl daşıdır. Ona görə də bu sahəyə sistemli nəzarət zəruridir. Mümkündür ki, qısamüddətli mühafizə orderlərinin verilməsi birbaşa Komitəyə həvalə olunsun və ya bu səlahiyyət polisin üzərinə götürülsün. Beləliklə, reaksiya daha çevik ola bilər”.
Müsahibin sözlərinə görə, unutmamalıyıq ki, ailə, kişi və dövlət anlayışları bir-birini tamamlayan əsas sütunlardır:
“Qarabağ və Vətən müharibəsində qəhrəmanlıq göstərmiş gənclərin əksəriyyəti məhz sağlam ailə mühitində formalaşıb. Buna görə də milli birliyin əsası ailədə qoyulur və ailənin qorunmasına xüsusi diqqət yetirilməlidir. Ailə təsadüfi bir struktur deyil, cəmiyyətin möhkəmliyinin əsasını təşkil edir. Onu qorumağa daha ciddi yanaşmaq hər birimizin borcudur”.
Fidan Hacızadə
Sfera.az
