İllər keçdikcə texnologiyanın inkişafı ilə yanaşı, düşüncə tərzi və mental dəyərlər də dəyişir. Bu dəyişikliklər insanların tanışlıq və evlilik standartlarına da təsir göstərir. Artıq gənclər sosial platformalar vasitəsilə münasibətlər qurur və bəzi hallarda bu münasibətlər güclənərək evliliyə qədər gedib çıxır.

Maraqlıdır ki, onlayn tanışlıqların uğur faizi və real münasibətlərə çevrilmə halları necədir?

Bununla bağlı Sfera.az-a açıqlama verən sosioloq Elçin Bayramlı son illərdə onlayn platformalarda tanışlıq hallarının artdığını və bu münasibətlər nəticəsində ailə quranların sayının da çoxaldığını deyib.

Onun sözlərinə görə, bu təbiidir, çünki əhalinin böyük əksəriyyəti sosial şəbəkələrdən istifadə edir:

“Əgər real həyatda bir insanın ünsiyyət dairəsi 5–10 nəfərlə məhdudlaşırsa, virtual aləmdə yüzlərlə insanla əlaqə qurmaq mümkündür. Bu isə ailə qurma prosesinə də birbaşa təsir göstərir. Unutmaq olmaz ki, onlayn tanışlıq sadəcə vasitədir. İnsanlar bir-birini müxtəlif şəraitdə tanıya bilər – əsas məsələ kimlə və hansı dəyərlər əsasında münasibət qurduqlarıdır. Burada iki önəmli amil var: birincisi, seçim meyarları; ikincisi isə tanışlıq müddəti. Tez bir zamanda evlənmək çox vaxt uğursuz nəticələrə gətirib çıxarır. Çünki tərəflər bir-birini kifayət qədər tanımadan ailə qurduqda bu, “oyuncaq ailə”yə çevrilir və tezliklə dağılır”.

Sosioloq ən azı 1–2 il, hətta 3–4 il ərzində tanışlıq mərhələsi keçməyin vacib olduğunu bildirib:

“Bu müddətdə gənclər bir-birinin həyat tərzini, xarakterini, psixologiyasını, maraqlarını və ruhi vəziyyətini öyrənirlər. Beləliklə, münasibət sağlam təməl üzərində qurulur. Əks halda, həm real həyatda, həm də virtual məkanda başlanmış sürətli münasibətlər çoxsaylı problemlərə səbəb olur. Milli dəyərlərimizdə də bir neçə mərhələli ailə qurma ənənəsi mövcuddur: əvvəlcə gənclər bir-birini görür və xoşlanırlar, sonra ailələrin tanışlığı və elçilik baş tutur. Razılıq əldə olunduqda nişan mərasimi keçirilir, müəyyən müddət nişanlılıq dövrü davam edir və yalnız hər şey qaydasında olduqda toy mərasimi baş verir. Bu mərhələlər tərəflərə bir-birini yaxından tanımaq, uyğunlaşmaq və sağlam ailə qurmaq imkanı yaradır. Əgər uyğunluq yoxdursa, ailə qurulmadan münasibət dayandırılır”.

E. Bayramlı qeyd edib ki, eyni prinsip onlayn tanışlığa da aiddir:

“Virtual məkanda ölkənin müxtəlif bölgələrindən insanlar bir araya gəlir, ünsiyyət qurur, ortaq maraqlarını bölüşür və uyğun olan şəxslə yaxınlıq qurur. Sonra real görüşlər və zaman keçdikcə münasibətin möhkəmlənməsi baş verir. Əsas olan, dostu və ya həyat yoldaşını seçərkən düzgün meyarları əsas götürməkdir. Məsələ vasitədə deyil, seçimdədir. İnsan avtobusda da tanış ola bilər, təsadüfən də. Amma seçim meyarları düzgün deyilsə, yəni münasibət maddi maraqlar və mənfəət üzərində qurulursa, problemlər qaçılmazdır. Təəssüf ki, son dövrlərdə boşanmaların çoxalmasının əsas səbəbi də budur. Əvvəllər mənəvi dəyərlər üstünlük təşkil edirdi, indi isə “müasirlik” adı altında mənəvi keyfiyyətlər arxa plana keçib və bu, ailə institutuna mənfi təsir göstərib”.

Fidan Hacızadə

Sfera.az

Instaqramda tanıdı, indi evlənir - Yeni evlilik trendi