İnsanlar məclislərdə israfçılıq edir - QMİ rəsmisi
Azərbaycanın bir sıra bölgələrində keçirilən yas mərasimlərində dəbdəbəli ehsan süfrələrinin verilməsinə məhdudiyyətlər tətbiq olunmağa başlanılıb. Məqsəd israfın qarşısını almaq və vətəndaşların üzərinə düşən sosial-iqtisadi yükü azaltmaqdır.
Baş verənlərlə bağlı Sfera.az-a açıqlama verən QMİ sədrinin müavini Fuad Nurullayev bu qərarların insanların öz təşəbbüsü ilə qəbul edildiyini dedi.
O təəssüf edir ki, həm toy, həm də yas mərasimlərində süfrələr açılan zaman israfçılığa yol verilir:
“Görürük ki, bəzi şəxslər şənliklər təşkil edir və adambaşına düşən süfrə qiymətləri 50, 80, 200, hətta 300 manata qədər yüksəlir. Bu, israfçılıqdır, lüzumsuz xərcdir. Eyni hal müəyyən səviyyədə yas mərasimlərində də müşahidə olunur. Bu cür məsələlər cəmiyyət üzvləri tərəfindən düşünülərək nizamlanmalıdır".
F. Nurullayev bunun yalnız dini məsələ olmadığını qeyd edib.
O əlavə edib ki, İslamın bu mövzuya baxışı Müqəddəs Qurani-Kərimdə buyurulur:
“Yeyin, için, lakin israf etməyin. Çünki Allah israfı sevməz”. Bu, Quranın aydın şəkildə ifadə etdiyi bir ayədir. Kim bu çağırışa diqqət yetirirsə, o insan mənəvi cəhətdən doğru yoldadır. Camaat da bu cür məsələləri bölgələrdə öz aralarında razılaşaraq qaydaya salmalıdır”.
Fidan Hacızadə
Sfera.az
