"Bu anı yaşamışam" deyənlərin NƏZƏRİNƏ

Araşdırmalara görə, insanların əksəriyyətinin həyatında ən az bir dəfə yaşadığı “deja vu”hissi – yəni “bu anı daha əvvəl yaşamışam” düşüncəsi beynin yaddaş mexanizmləri ilə sıx bağlıdır.

Sfera.az xəbər verir ki, alimlərin fikrincə, “deja vu” zamanı beynin temporal lob bölgəsi aktivləşir. Xüsusilə, yaddaşla bağlı siqnalları idarə edən hipokamp adlı bölgə yanlış siqnal göndərərək insanda tanışlıq hissi yaradır. Başqa sözlə, beyin keçmiş xatirə ilə indiki anı səhv salır və “bu an artıq olub” mesajı verir.

Ən maraqlısı isə odur ki, “deja vu” sağlam insanların beynində baş verən normal prosesdir və əslində yaddaşın “yoxlama” mexanizmi kimi izah olunur. Tədqiqatçılar bunu kompüterin “təkrar yoxlama funksiyası” ilə müqayisə edirlər.

Tədqiqatların nəticələri göstərir ki, “deja vu”stres, yorğunluq, ya da yeni yerlərə səyahət zamanı daha çox yaşanır. Ancaq bu hal nadir hallarda olsa da, bəzi nevroloji xəstəliklərin xüsusən temporal lob epilepsiyasının xəbərçisi ola bilər.

Fidan Hacızadə
Sfera.az