Neftçala sakini Elnur Əhmədovun həbsdə olduğu müddətdə adına cərimələr yazılıb. Şikayətçi Elnur Əhmədovun sözlərinə görə, o, 25 sentyabr 2024-cü il tarixində azadlıqdan məhrum edilib və 15 mart 2025-ci ildə azadlığa buraxılıb.

Sfera.az-ın məlumatına görə, həmin dövrdə onun adına müxtəlif nəqliyyat vasitələrinin qayda pozuntuları səbəbindən protokollar tərtib olunub.

Elnur Əhmədov həbsdə olduğu müddət ərzində ümumilikdə 700 manata yaxın məbləğdə cərimə ilə üzləşib.

Elnur Əhmədov bildirir ki, bu cərimələrin əksəriyyəti eyni lizinq şirkətinə məxsus avtomobillərə aiddir. Hazırda cərimələr ödənmədiyi üçün Elnurun sürücülük vəsiqəsinə məhdudiyyət qoyulub.

Şikayətçi bununla bağlı aidiyyəti qurumlara müraciət etsə də, nəticə əldə edə bilməyib.

Məsələ ilə bağlı Daxili İşlər Nazirliyinə sorğu göndərdik. Nazirlikdən verilən cavabda bildirildi ki, Elnur Əhmədova "Xəlilzadə" MMC tərəfindən bir neçə nəqliyyat vasitəsini idarə etmək hüququ etibarnamə əsasında verilib. Qayda pozuntuları və tətbiq edilən cərimələr də məhz həmin etibarnamələr əsasında onun adına rəsmiləşdirilib.

Adıçəkilən şirkətlə də əlaqə saxladıq. Amma konkret cavab verilmədi. "Xəlilzadə" MMC -nin artıq fəaliyyət göstərmədiyini əsas gətirərək bir növ məsuliyyəti öz üzərindən atdılar.

Vəkil Babək Həmidov isə məsələnin hüquqi tərəflərini izah edib.

Xezerxeber.az mövzu ilə bağlı daha ətaraflı videomaterialı təqdim edir:

Həbsdə olduğu müddətdə adına cərimələr yazılıb - VİDEO