Azərbaycanda boşanma halları artımaqdadır. Boşanmağa səbəb olan amillər arasında münasibətlərdəki anlaşmazlıqlar, maddi çətinliklər və xarici müdaxilələr ön plana çıxır.

Bəs boşanma üçün ən çox müraciət edən tərəf hansıdır?

Sfera.az-a açıqlama verən psixoloq Ülkər Məhərrəmova bildirib ki, boşanmaya müraciət edənlərin çoxu qadınlardır. Onun sözlərinə görə, qadınlarda bu istəyin artması müxtəlif səbəblərlə bağlıdır:

"Rəsmi məlumatlara görə, boşanmaq üçün müraciət edənlərin 70 faizini qadınlar təşkil edir. Boşanmaya görə ən çox qadınların müraciət etməsi bir neçə səbəbdən irəli gəlir. Qadınlar çox vaxt ailədəki problemləri daha açıq şəkildə ifadə etməyə meyllidirlər və münasibətlərdəki qeyri-sağlam durumları daha tez hiss edirlər. Sosial dəyişikliklər və gender bərabərliyi məsələləri də qadınların daha çox boşanma qərarı verməsinə səbəb ola bilər. Qadınlar əvvəlki dövrlərə nisbətən öz hüquqlarını daha çox müdafiə etməyə, mənəvi və emosional azadlığa sahib olmağa çalışırlar. Bununla yanaşı, evlilikdəki psixoloji və emosional problemləri, xüsusən də qarşılıqlı anlaşılmazlıq və münasibətlərin düzgün qurulmaması qadınlar üçün daha ağır ola bilər. Sosial təzyiqlərin və maddi asılılığın azaldılması da qadınları boşanmağa daha çox təşviq edir, çünki artıq çoxları öz həyatını müstəqil şəkildə qurmağı bacarır. Təbii ki, hər bir cütlük fərqli vəziyyətlərdədir, amma ümumi tendensiyalara baxdıqda qadınların boşanma üçün müraciət etməsi, ailə içindəki problemlərin həllinə dair daha çox və daha açıq bir yanaşmanın nəticəsidir”.

Psixoloq Ü.Məhərrəmova boşanma səbəbləri arasında ən çox rast gəlinən məsələləri də vurğulayıb:

“Maddi sıxıntılar, ailə üzvlərinin və ya ətrafın müdaxiləsi, xüsusilə valideynlərin müdaxiləsi, münasibətləri daha da çətinləşdirir. Bu müdaxilələr, çox zaman tərəflərin münasibətlərinə təsir edir və boşanma qərarına yol açır. Maddi çətinlik və bir tərəfin maddi asılılığı da evliliklərdə gərginliyi artırır. Bəzən bu çətinliklər qarşısında cütlüklər münasibətlərini qorumaq üçün daha az səy göstərirlər. Təhsil və sosial status fərqləri olan cütlüklər arasında, xüsusən də fərqli düşüncə tərzləri və həyat məqsədləri məsələsi, zamanla böyük qarşıdurmalara gətirib çıxara bilər”.

Ü.Məhərrəmova hesab edir ki, evlilikdən əvvəlki gözləntilərin evlilikdən sonrakı reallıqla uyğunlaşmaması da boşanma səbəblərindən biridir. Psixoloq evliliyə dair qarşılıqlı gözləntilərin çox olduğu halda, bu gözləntilərin yerinə yetirilməməsinin münasibətləri daha da gərginləşdirdiyini qeyd edib:

“Evlilikdəki öncə ideallaşdırılmış görüntü ilə real həyatın üst-üstə düşməməsi, insanlar arasında məyusluqlara səbəb olur. Cütlüklər arasında idealizə edilmiş bir evlilik gözləntisi və həyatın real şəraiti arasında fərq yarandıqda, münasibətlərdəki boşluqlara səbəb ola bilir. Bəzən insanın gözlədiyi "mükəmməl" həyat ilə real həyat arasındakı fərqlər boşanmağa səbəb olur”.

Bəsti Rəfizadə

Boşanmaya gətirib çıxaran səbəblər: “Sosial dəyişikliklər və gender bərabərliyi…”