"İndi subay oğlanlar boşanmış qadınlarla evlənirlər, çünki..." – AÇIQLAMA

Subay oğlanların boşanmış qadınlarla münasibət yaşadığını və evləndiyini tez-tez eşidirik.

Bəs bu nə ilə əlaqədardır?

Mövzu ilə bağlı Sfera.az-a danışan klinik psixoloq Nahidə Axundova bildirib ki, subay kişilərin boşanmış qadınlarla ailə qurma hallarının artması bir neçə sosial və mədəni faktorlarla izah edilir.

"Boşanma daha çox qəbul edilən bir hal olub. Əvvəllər boşanmış qadınlara qarşı mənfi stereotiplər mövcud idisə, indi bu baxışlar getdikcə zəifləyir və daha az əhəmiyyətli olur. İnsanlar evlilikləri və şəxsi həyatlarındakı seçimləri daha çox fərdi azadlıqlara əsasən qəbul edirlər. Düşünmək olar ki, boşanmış qadınların əvvəlki evliliklərindən müəyyən təcrübələr əldə etmələri onların gələcək münasibətlərə daha yetkin və məsuliyyətli yanaşmasına səbəb olur. Bununla da oğlanlar belə şəxslərlə ailə qurarkən ailənin daha stabil və sağlam münasibətlər üzərində qurulacağına inanırlar".

Psixoloq qeyd edib ki, son zamanlar subay kişilər yalnız gənc qadınlarla deyil, öz yaşlarına uyğun, həyat təcrübəsi olan qadınlarla da maraqlanmağa başlayıblar.

“Bu da onlarda boşanmış qadınların həyat təcrübəsinin daha cox olması kimi fikirlər yaradır. Gənclərdəki ailə anlayışı artıq əvvəlki dövrlərlə müqayisədə daha çox müasir münasibətlər, emosional və ruhi bağlılığa əsaslanır. Həyat yoldaşını yalnız fiziki ya da yaş statusuna görə deyil, şəxsi keyfiyyətlərinə və münasibətdə yaratdığı dəyərlərə görə seçirlər. Əlavə olaraq, cəmiyyətdə artıq ikinci şans konsepti getdikcə daha çox qəbul edilir. Boşanmış qadınlar həyatlarına yenidən başlamaq üçün bu şansı axtarır, eyni zamanda bəzi subay kişilər də keçmişdəki yanlışlıqları nəzərə alaraq, yeni münasibətlər qurmağa daha açıq olurlar. Bütün bu faktorlar subay kişilərin boşanmış qadınlarla ailə qurmasını daha geniş qəbul edilən və başadüşülən bir seçim halına gətirir”.

Ülkər Abdurahmanlı