“Azərbaycanda, nəhayət ki, sərnişindaşıma nəqliyyatının, heç olmasa bir növündə dinamik qiymət siyasətinə keçid baş verir. Azərbaycan Dəmir Yolları bilet qiymətlərinə beynəlxalq təcrübədə olan yanaşma tədbiq etməyə başlayır”.

Sfera.az bildirir ki, bunu iqtisadçı Natiq Cəfərli deyib.

O qeyd edib ki, rəsmi məlumata görə, şəhərlərarası qatar biletlərində öncədən alanda 15% endirim, bank kartı ilə bilet əldə edəndə əlavə daha 3% “cash back” tədbiq ediləcək:

“Bundan başqa, qatarlara satılan biletlərin sayı az olanda gün ərzində əlavə qiymət endirimləri olacaq. Uzun illərdir ki, biz nəqliyyat sektorunda məhz belə yanaşma təklif edirdik. Avtobus və metroda gedişhaqqının çevik və diferensial olması lazımdır. Bizdə nədənsə avtobus və metroda gedişhaqqı kimi birdəfəlik bilet qiyməti əsas götürülür. Bu, çox ziyanlı yanaşmadır. Dünyanın inkişaf etmiş ölkələrində saatlıq, bir neçə günlük, aylıq, 6 aylıq və illik biletlər mövcuddur. Birdəfəlik gediş biletləri tədbiq edilmir və nə qədər uzun zamanlı bilet alırsansa, gediş üçün bir o qədər az ödəyirsən. 

Məsələn, Praqada yerüstü şəhəriçi nəqliyyatın bütün növlərindən istifadə üçün 1 saatlıq bilet qiyməti, təxminən, 1 avrodan bir az çoxdur - təqribən, 1 manat 90 qəpik, yəni 1 saat ərzində sərnişin metro, avtobus, tramvaydan bir neçə dəfə istifadə edə bilər. Amma siz 1 aylıq bütün növ nəqliyyatdan istifadə üçün bilet alsanız, 22 avro ödəmiş olacaqsınız, təqribən, 42 manat. Əgər 1 illik bilet almaq istəsəniz, 145 avro ödəmək lazımdır,  təqribən 275 manat”.

İqtisadçı sözügedən nümunələrin Azərbaycan üçün də tətbiq edilməli olduğunu vurğulayıb:

“Yəni bunu Azərbaycana proyeksiya etsək, gündə 3-4 dəfə nəqliyyatdan istifadə etməyə məcbur olan Bakı sakini 1 illik bileti günü 75 qəpiyə alacaq. Bu da bir gedişi 18 qəpik edəcək. Mən demirəm ki, bizdə də illik bilet 275 manat olmalıdır, xeyr, Praqa sakininin orta aylıq maaşı Bakı sakininin orta aylıq maaşından 2-3 dəfə çoxdur. Bizdə illik bilet 160-170 manat olmalıdır ki, bu da günü 45 qəpiyə, gündə 3 dəfə nəqliyyatdan istifadə etsə, bir gediş haqqı 15 qəpiyə düşəcək. Onu da deyim ki, Praqada 0-6 yaş arası uşaqlara nəqliyyat pulsuzdur, 6-18 yaş arası, tələbələr və təqaüdçülər üçün isə yuxarıda yazdığım qiymətlərə 50% endirim olur”.

Günay Rəsulqızı