Bakı Şəhər Dövlət Yol Polisi İdarəsi ilə 1 nömrəli Uşaq-Gənclər İnkişaf Mərkəzi tərəfindən küçə və yollarda nəqliyyat vasitələrinin hərəkət intensivliyinin yüksək olduğunu nəzərə alaraq uşaqların təhlükəsizliyinin təmin edilməsi, onlara yol hərəkəti qaydalarının öyrədilməsi məqsədilə aparılacaq işlərə start verilib.

Daxili İşlər Nazirliyindən Sfera.az-a verilən məlumata görə, işlər Uşaqlar və Yol Təhlükəsizliyi üzrə 2024-2025-ci tədris ili üçün uyğunlaşdırılmış birgə Fəaliyyət Planı və "Diqqət, uşaqlar" adı altında keçirilən hərəkətin təhlükəsizliyi aylığı proqramına uyğun olaraq həyata keçirilir.

Belə ki, ötən gün “Diqqət, uşaqlar!” aylığı çərçivəsində BŞDYPİ əməkdaşları 1 nömrəli Uşaq-Gənclər İnkişaf Mərkəzinin pedoqoji heyəti ilə görüş keçirib. Görüşdə aylıq çərçivəsində görülən işlər və qarşıda duran vəzifələr müzakirə olunub.

Tədbirdə Bakı Şəhər Dövlət Yol Polisi İdarəsinin inspektoru, polis kapitanı Pərvanə Muradova, 1 nömrəli Uşaq-Gənclər İnkişaf  Mərkəzinin direktoru Kəmalə Abdullayeva, Azərbaycan Milli Avtomobil Klubunun əməkdaşı Həsən Xıdirov, Mərkəzin əməkdaşları və valideynlər iştirak edib. 

Görüş zamanı “Diqqət, uşaqlar!” aylığı çərçivəsində yol hərəkəti qaydalarının təbliğ olunması məqsədilə Bakı Şəhər DYP İdarəsi və 1 nömrəli Uşaq-Gənclər İnkişaf Mərkəzi tərəfindən hazırlanmış “Valideynlərə və uşaqlara xəbərdarlıq”, “Yol hərəkəti qaydalarına riayət et!” adlı plakatların, bukletlərin ümumtəhsil məktəblərinə çatdırılması, müvafiq lövhələrə vurulması, məktəb ərazilərində maarifləndirici söhbətlərin  və tədbirlərin keçirilməsi müzakirə edilib.

Firuzə Əliyeva