Evlilik yaşı məsələsi bir çox ölkələrdə müzakirə olunur. Son vaxtlar isə bəzi ölkələrdə psixoloqlar və ya ailə məsələləri üzrə mütəxəssislər təklif edir ki, qanunla yetkinlik yaşı 18 yox, 25 olmalıdır. 18 yaşda insanlar yetkinləşmir, həyatı hələ dərk etmirlər. 25 yaşdan aşağı insanlara isə evlənməyə icazə verilməməlidir, belə olan halda, boşanmaların da qarşısını almaq mümkün olar. 

Evlilik və yetkinlik yaşı artırılmalıdırmı?

Bununla bağlı Sfera.az-a açıqlama verən psixoloq Gülnar Orucova deyib ki, evlilik yaşı insan psixologiyasına, böyüdüyü mühitə, tərbiyə aldığı ailəyə görə dəyişir:

“Əvvəllər çox erkən yaşda ailə həyatı qurur və uğurlu ola bilirdilər. İndi isə kifayət qədər kamil yaşda evlənənlər belə uğursuz ola bilir. Bu, insana görə dəyişən bir prosesdir. Ümumilikdə evliliyin minimum yaş həddi Konstitusiyada 18 olaraq göstərilirsə, düşünürəm ki, bu, daha yuxarı olmalıdır. Çünki 18 yaşında bir kişi öz ailəsini fiziki, maddi baxımdan təmin etməyə bilər. Fikrimcə, insanlar, xüsusilə xanımlar özlərindən 5 yaş böyük şəxslərlə ailə həyatı qurmamalıdırlar. Çünki onların həyata baxışları belə uyğunlaşmaya bilir, yaş öz sözünü deyir. Konstitusiyada isə evlilik yaşı artırılmalıdır. Eləcə də insan müəyyən yaşda nələrəsə sahib olmalı və özünü evliliyə hazır hiss etməlidir. Ailə həyatı quran hər bir insan özünə bu sualları verməlidir:

“Mən bu insanla davam edə biləcəmmi”, “Həyat yoldaşımla fikirlərim, arzularım uyğunlaşırmı”, “Mən partnyorumla indiki vəziyyətindən də pis olduğu halda, maddi baxımdan çətinlik çəkəndə və ya xəstəliyi olanda birlikdə qala biləcəmmi”...

Psixoloqun fikrincə, 25 yaşından aşağı olan bir xanım ailə həyatı qurmamalı, eynilə də, 25 yaşından aşağı olan bəy evlilik haqqında düşünməməlidir:

“Bəylər 28 və ondan sonrakı yaşda evlənməlidir, xanımlar da 24 yaşından sonra ailə həyatı qurmalıdırlar. İnsan bədən olaraq 18 yaşında doğuş etməyə hazır olmur. Ümumiyyətlə, erkən nikaha razılıq verən valideynlər məsuliyyətə cəlb olunmalıdır. Müəyyən bölgələr var ki, o zonalarda uşaqlar 16 yaşında ailə həyatı qururlar. Hətta tanıdığım bir xanım rayona getmirdi və səbəbi isə təəccüblü idi. O deyirdi ki, artıq mənim 23 yaşım var, mənə getdiyim bölgədə müəyyən xoşa gəlməyən sözlər deyilir. Görün, millətin kosmosa uçduğu bir dövrdə bizimkilər nə düşünür – sənin 23 yaşın var, evdə qalmısan, ailə qurmaq üçün uyğun deyilsən, səni kim alacaq və sairə. Biz insanların maarifləndirilməsinə çalışmalıyıq. Eyni zamanda biz artıq xanımların özlərindən kiçik yaşda olan kişilərlə ailə qurmağına da normal yanaşmalıyıq. Niyə, bəy xanımdan 14, 15 yaş böyük ola bilir, amma xanım bəydən 2-3 yaş böyük ola bilmir? Bütün bu məsələlər normal qarşılanmalıdır”.

Günay Rəsulqızı