Bir neçə məntəqədə seçkinin nəticələri ləğv edildi
Sentyabrın 1-də keçirilmiş Milli Məclisə növbədənkənar seçkidə 70 saylı Neftçala seçki dairəsindən deputatlığa namizədliyi qeydə alınan Vəfa Nağıyevanın şikayətinə baxılıb.
Sfera.az xəbər verir ki, bununla bağlı Mərkəzi Seçki Komissiyasının (MSK) bu gün keçirilən iclasında məsələ müzakirə edilib.
MSK daxilində fəaliyyət göstərən ekspert qrupunun üzvü Ramiz İbrahimovun təqdimatına əsasən, şikayətçi müraciətinə 86 videogörüntü və fotosürət olan 49 protokolun şəklini əks etdirən elektron informasiya daşıyıcısı əlavə edilib. Onunla əlaqə saxlanılıb, araşdırmada özü və vəkilinin iştirakı təmin edilib. Aparılan araşdırma zamanı dairənin 24, 27, 34, 35, 48, 49 saylı məntəqələrində qanun pozuntularına dair hüquqi əsaslar müəyyən edilib. Beləliklə, həmin məntəqələrin nəticələri ləğv edilib.