"Kasıblar çirklənmiş şəhərlərdə, bitişik dar mənzillərdə kirayə qalacaqlar" - HƏYƏCAN TƏBİLİ

“Hazırda dünyada böyük sürətlə mülkiyyətsizləşdirmə siyasəti tirajlanır”.

Sfera.az bildirir ki, bunu iqtisadçı ekspert Eldəniz Əmirov deyib.

Onun sözlərinə görə, bu, qlobal dünyada titan kapitalistlərin insanların beyninə yeritdiyi qorxunc koddur:

“”Nə edirsən evi?! Kirayə qal, evin daimi xərclərindən, problemlərindən azad ol və xoşbəxt yaşa”, deyirlər. Bu, yeni kölələşmə dövrünün başlanğıcıdır. Ölkələr nə qədər çox inkişaf edirsə, mənzil əlçatanlığı çətinləşir və böyük şəhərlərdə “daş-beton qutu”larda kirayə qalanların sayı artır. Gələcək insanı tam asılı duruma salmaq üçün mülkiyyətsizləşmə sürətləndirilir və kirayəçi kütləsi artır”.

Ekspert qeyd edib ki, bütün əmlaklar iri kapital sahibləri tərəfindən alınır:

“Hətta inkişaf etməmiş ölkələrdə belə kənd yerlərini, torpaqları məmurlar kütləvi alır. Çox yox, cəmi 200 il sonra kasıblar çirklənmiş şəhərlərdə bir-birinə bitişik dar mənzillərdə kirayə qalacaqlar. Bu əmlakların sahibləri və ya digər varlılar isə təmiz kəndlərdə yaşayacaqlar”.

Türkan