“Daimi sıxlıq olan yolları daraldıb avtobus zolağı etmək..." - Ekspert ŞİKAYƏTLƏNDİ

Xəbər verdiyimiz kimi, Bakının Abbas Mirzə Şərifzadə küçəsində (İsfəndiyar Zülalov küçəsi ilə kəsişmədən Müzəffər Həsənov küçəsi ilə kəsişməyədək) 4 km-dən çox hərəkət zolağı təşkil edilib. Həmin yol sahəsində avtobus zolaqlarının tələblərinə uyğun olaraq nişanlanma xətləri çəkilib və müvafiq yol nişanları quraşdırılıb.

Sfera.az-ın məlumatına görə, bununla bağlı danışan əmlak məsələləri üzrə ekspert Elnur Fərzəliyev deyib ki, yaxın gələcəkdə bu tip addımlar qeyri-yaşayış obyektlərinin bağlanmasına şərait yaradacaq:

“Yollarda avtobus xətlərinin çəkilməsi yaxşıdır, amma bu cür sıxlıq olan küçələrin bir hissəsini bağlayıb avtobus xətləri üçün istifadəyə vermək,  həmin küçələri daha da iflic vəziyyətə gətirmək deməkdir. Bundan əlavə, yol üzərində yerləşən bütün qeyri-yaşayış obyektləri də müştəri itirir və ya bağlanır”.

Ekspert bildirib ki, məqsəd avtobus yolu çəkməkdirsə, yolları genişləndirib bunu etmək mümkündür:

“Daimi sıxlıq olan yolları daraldıb avtobuslar üçün istifadəyə vermək... Yaxın gələcəkdə bu tip küçələr üzərində olan qeyri-yaşayış obyektlərinin asta-asta bağlanmasının və satış qiymətlərinin kəskin enməsinin şahidi olacağıq”.

Günay