Sabahdan müsəlman aləmi üçün müqəddəs sayılan Ramazan bayramı günləri başlayır. Qafqaz Müsəlmanları İdarəsinin məlumatına görə, bayram 10-11 aprel tarixində qeyd ediləcək. Bildirilib ki, bütün məscidlərində bayram namazları qılınacaq. Bakıda Əjdərbəy məscidində bayram namazının vaxtı saat 08:00, Təzəpir məscidində 09:00-a təyin edilib.

Maraqlıdır, Ramazan bayramı günlərində nələr edilməlidir?

Bununla bağlı Sfera.az-a açıqlama verən ilahiyyat üzrə fəlsəfə doktoru Ceyhun Məmmədov deyib ki, İslam ənənələrinə əsasən, gün bayram namazı ilə başlayır:

“Bayramdan sonra insanların bir-birini, valideynlərini və qohum-əqrəbalarını ziyarət etmələri tövsiyə olunur. Əksər müsəlman ölkələrində həm də qəbirlər ziyarət olunur, dünyasını dəyişən insanların ruhuna dualar oxunur”.

C.Məmmədovun sözlərinə görə, bayram günlərində tövsiyə edilən əməllərdən biri də küsülülərin barışmasıdır:

“İslamın bəyənmədiyi əməllərdən biri də insanların bir-birindən küsməsidir. Oruc fərdi ibadətdən daha çox ictimai ibadətdir. Onun faydasını cəmiyyətin bütün üzvləri hiss etməlidir”.

Günay