DİN-dən əhaliyə MÜRACİƏT: “Bayram günlərində...”
“Bayram günləri ilə əlaqədar qeyri-iş günlərində avtonəqliyyat vasitələrində səfərə çıxanların sayı əhəmiyyətli dərəcədə artacaq. Bunun nəzərə alınması, sürücü və sərnişinlərdən bir sıra qaydalara ciddi əməl etmələri xahiş olunur”.
Bu barədə Sfera.az-a DİN-in Baş Dövlət Yol Polisi İdarəsindən məlumat verilib. Qurum Ramazan bayramı ilə əlaqədar əhaliyə müraciət edib:
“İlk növbədə səfərə hazırlaşan sürücülər bayram günlərində xoşagəlməz hadisələrin yaşanmaması üçün nəqliyyat vasitələrinin sazlığına diqqət yetirməli, hərəkət zamanı təhlükəsizlik kəmərini bağlamalı, sərnişinlər də bu qaydaya sözsüz əməl etməlidirlər. Dəyərli sürücülər, yorğun, yuxusuz halda sükün arxasına əyləşməkdən çəkinin, uzaq məsafə qət edərkən DYP-nin stasionar postlarında yaradılan şəraitdən istifadə etməklə qısa müddətli olsa da istirahət edin!”.
Qurum həmçinin qeyd edib ki, sürət rejiminə, ötmə və manevr etmə qaydalarına ciddi riayət etmək, yol və hava şəraitini düzgün qiymətləndirmək həm sürücülərin, sərnişinlərin, həm də digər hərəkət iştirakçılarının təhlükəsizliyi üçün vacib şərtdir.
Günay
