Azərbaycan-Ermənistan sərhədi hansı xəritələrlə müəyyənləşəcək? – “Ermənilər xəritələri saxtalaşdırsa da...”
13:27 / 21.06.2021
2574
"Ermənilər
özlərindəki xəritələrdə nəyisə dəyişsələr də, onların Moskvada təsdiq olunmuş və
hər iki tərəfə verilən variantı var.
Verilən bu təsdiqlənmiş variant üzərində İrəvan hansısa saxtakarlığa gedibsə,
bunun Azərbaycana heç bir dəxli yoxdur”.
Bu sözləri Sfera.az-a açıqlamasında Azərbaycanın
Xarici İşlər naziri Ceyhun Bayramovun Ermənistanla sərhəd məsələsinin həlli
üçün səsləndirdiyi təklifi dəyərləndirərkən politoloq Cümşüd Nuriyev deyib.
Politoloqun sözlərinə görə, yaranacaq fəaliyyət qrupunda hər iki tərəfdən
Xarici İşlər Nazirliyi və İqtisadiyyat Nazirliyi nəzdində torpaq məsələsinə
baxan nümayəndələr və hərbi topoqraflar iştirak etməlidir:
"Azərbaycanla Ermənistan arasında sərhədin
398,7 kilometrlik hissəsi işğal altında
olduğundan, həmin ərazilərdə heç bir sərhəd dəqiqləşməsi aparılmayıb. Dəqiqləşmənin
aparılması üçün hər iki ölkə tərəfindən fəaliyyət qrupu yaradılmalıdır. Digər tərəfdən,
topoqrafik xəritələr üzərində coğrafi uzunluq və enliyə görə demarkasiya
aparılmalıdır. Azərbaycanla Ermənistan arasında sərhədlər hələ sovet dönəmindən
dəqiq müəyyənləşdirilib. Hər iki tərəf
bu dəqiq sərhədləri qəbul edib. Ötən əsrin
70-ci illərində Heydər Əliyevin təkidilə sərhədlər bir daha tam olaraq dəqiqləşdirildi.
Paşinyan bunu bilir və ona görə də etiraz etmir”.
C. Nuriyev bildirib ki, müxtəlif
narazılıqların olmaması üçün Ceyhun Bayramov sözügedən doğru təkliflə çıxış
edib: "Ermənistanla Azərbaycan arasında sərhəddə
delimitasiya olunacaq bir yer, mübahisəli ərazi yoxdur. Keçmiş Zəngəzurdakı Azərbaycana
aid ərazilər də öz yerindədir. Sərhədçlərimizin burada hazırda durduğu ərazi Azərbaycanın
ərazisidir”.
Rüfət SULTAN
