\"Dolların bahalaşması ehtimalı sıfıra yaxındır\" - Ekspert rəyi
14:14 / 24.05.2017
1737
"Əslində daşınmaz əmlak bazarında baş verən proseslər bir neçə amillərə bağlıdır. Adətən daha çox yaz-yay aylarında canlanma baş verir. Xaricdə yaşayan insanlar, həm daxili bazarda gözləmə mövqeyi tutan insanlar məhz, bu mövsümdə mənzil bazarı ilə daha yaxından maraqlanır və nəzərdə tutduğu alışı həyata keçirir"
Bu sözləri Sfera.az-a daşınmaz əmlak bazarında qiymətlərin artıb-artmamasından danışarkən iqtisadçı ekspert Natiq Cəfərli deyib.
Ekspert uzun illərdir bir ənənənin formalaşdığını bildirdi:
"Qış ayları mənzil bazarında sakitçilik hökm sürür. Mövsümü amilləri nəzərə almasaq, yəni fundomental amillərə baxsaq, yaxın gələcəkdə ciddi bahalaşma baş verə bilməz. Çünki insanların alıcılıq qabiliyyəti çox aşağı düşüb. Xaricdən əmlak bazarına daxil olmalar azalıb, kreditləşmə dayanıb. Banklar ümumiyyətlə, mənzil kreditləri vermirlər, ipoteka ilə verilmiş kreditlərin sayında xeyli dərəcədə azalma var. Bundan başqa, sosial mənzil tikintisinə start verilib. Bu layihə uğurlu alınsa, ciddi şəkildə gerçəkləşsə, mənzil bazarına əlavə mənzillərin çıxarılması gözlənilir. Bütün bu faktorları və parametrləri nəzərə alsaq, yaxın və orta perspektivdə Azərbaycanda daşınmaz əmlak bazarında ciddi canlanma və yaxud da qiymət artımı gözlənilmir. Bu həm də məzənnə ilə olan problemlə əlaqəlidir. Son bir ay və ay yarım ərzində dolların məzənnəsi sabitləşib. Ancaq bunun ilin sonuna qədər belə davam edəcəyi barədə nəsə söyləmək mümkün deyil. Ciddi dəyişiklik də ola bilər. Əgər manat ucuzlaşarsa, o zaman manatla qiymətlərdə müəyyən artım ola bilər. Xarici valyutada isə dolların bahalaşması ehtimalı az qala sıfıra yaxındır".
Gülnarə Eynullaqızı
Sfera.az
