"Bu proses mərhələli şəkildə həyata keçməlidir. Belə ki, burada incə nüanslar, siyasi elementlər var. Ona görə də sözügedən prosesə birbaşa keçid məqsədəuyğun deyil”.

Sfera.az-a açıqlamasında bu sözləri Google, Facebook, Twitter, YouTube və s. texnoloji şirkətlərin gəlirlərindən digər ölkələrdə olduğu kimi Azərbaycanda da vergi tutulması məsələsinə münasibət bildirərkən internet media üzrə mütəxəsis Səbuhi Abbasov deyib:

"Əslində sosial şəbəkələrlə bağlı məsələlər ikitərəfli qaydada həll olunur. Yəni, proses sosial şəbəkənin özünün müraciəti və dövlətin münasibəti fonunda tənzimlənir. Diqqət yetirsək görərik ki, iri texnoloji şirkətlərdən vergi tutulması kimi tədbirlər daha çox böyük dövlətlərdə tətbiq olunur. Məsələn, Rusiyada, Çində, Türkiyədə, ABŞ-da bu təcrübə var. Azərbaycan da bu prosesə keçə bilər. Ancaq bu mərhələli şəkildə olmalıdır. Burada incə nüanslar, siyasi elementlər var. Ona görə də sözügedən prosesə birbaşa keçid məqsədəuyğun deyil. Bununla bağlı neçə illərdir müzakirələr gedir. Ancaq ortada yekun nəticə yoxdur”.

Həmsöhbətimiz düşünür ki, sözügedən proses mütləq şəkildə aidiyyatı qurumlarla razılaşdırılmış şəkildə həyata keçirilməlidir: "Yüksək texnoloji şirkətlərlə bağlı verginin tətbiq olunub-olunmaması ilə bağlı konkret hansısa mexanizm yoxdur. Azərbaycanda Facebook, YouTube, Twitter və digərlərinə vergi tətbiq olunması məsələsi qaldırılsa, bu halda başqa bir münasibətlə də qarşılaşa bilərik. Belə ki, həmin halda sözügedən sosial şəbəkələr Azərbaycan bazarını qismən tərk edə bilərlər. Bu isə 100 minlərlə azərbaycanlı istifadəçinin sosial şəbəkələrdən istifadəsində məhdudiyyətlərə gətirib çıxarar. Ona görə proses qarşılıqlı razılaşma əsasında həyata keçirilməlidir”.

S. Abbasovun fikrincə, bu məsələnin qanun müstəvisinə çıxması Azərbaycan üçün mühüm əhəmiyyət kəsb edəcək: "O mənada ki, Azərbaycanda sosial şəbəkələrlə bağlı hər hansı problem çıxarsa, vətəndaş məcbur olub, şirkətin mərkəzi ofisinə müraciət edir. Lakin sistemin tətbiqindən sonra mütləq şəkildə həmin şirkətlərin Azərbaycanda da ofisləri yaradılacaq. Bütün məqamlarda indiki halda birtərəfli qaydada Azərbaycan tərəfdən vergi ödənilməsi tələbi irəli sürülərsə, bu zaman xoşagəlməz situasiya ilə qarşılaşa bilərik. Ona görə düşünürəm ki, məsələ ilə bağlı xüsusi komissiya yaradılmalı, onlar sosial şəbəkələrlə kontakta girməli və qarşılıqlı razılaşma əsasında məsələni həll etməlidirlər. Bu mənada sosial şəbəkənin Azərbaycan bazarından külli miqdarda vəsait toplamasına nəzarət mexanizminin yaradılması vacibdir və hətta bu istiqamətdə bir neçə il gecikmişik”.

Elçin