Hər dəfə tanınmış bir şəxsin vəfat xəbəri yayılanda, sanki içimizdə gizlənmiş bir “sosial ədalət mühakiməçisi” oyanır. İnsan bu dünyadan köçür, amma onunla işimiz başsağlığı verməklə bitmir. Qəbrinin üstünə çıxıb cəmiyyətin dərdlərini, öz incikliyimizi və bir az da sosial populyarlıq həvəsimizi ora yönəltməyə çalışırıq.

Başlayırıq sosial şəbəkələrdə “Bizdə sənətkara qiymət verilmir”, “Dəyərlərimizi sağlığında qorumuruq”, “Mərhumun sonuncu videosu yayıldı”, hətta “Mərhumun sonuncu WhatsApp yazışmaları üzə çıxdı” kimi statuslar paylaşmağa. Paylaşımlarımızı fotolar və videolarla “bəzəyirik”. Bəzən elə şəkillər paylaşırıq ki, sanki mərhum ölməyib, sadəcə “trendlər”də yerini dəyişib. Bir müddət sonra isə bu ad xatirələrdən yox, statuslardan silinir. Sanki bütün bu hay-küy ölənə yox, sağ qalanlara ünvanlanır.

Bu yaxınlarda çox hörmət etdiyim bir sənətkar cavan yaşında vəfat etdi. Çox pis oldum. Bəlkə də uzun müddət onun yoxluğunu hiss edəcəyəm və mənim kimi bir çoxları da. Nəysə, gəldim dəfn mərasiminə. Adam çox idi çadırda. Sağ olsunlar, mənə hörmət edib sıxışıb yer verdilər. Yas mərasimlərində adətən başımı aşağı salıb, susqun oturmağa çalışıram. Amma bu dəfə anidən başımı qaldırdım ki, tanışlarımı görüm. Gördüyüm mənzərə artıq bundan sonra sosial şəbəkələrdə nələrin baş verəcəyindən xəbər verirdi.

Çadırdakıların az qala 20-30 faizi telefonlarını çıxarıb kameralarını ətrafa tuşlamışdı. Kimi mərhuma görə heyifsilənir, kimi isə tanınmış və tanınmamış adamları çəkirdi.

Hamımızın evində köhnə fotoalbomlar olub, yadınıza gəlir? Fotolarla dolu ağır bir kitab. Kimdə qalıbsa bir daha vərəqləsin. Görün, orada heç yas mərasimindən və ya qəbiristanlıqdan bir şəkil var? Yoxdur. Olmamalıdır da. Əvəzində toy, nişan, ailəvi gəzintilərdən şəkillər var. Sizcə onlar ölüm və həyatın mahiyyətini anlamırdılar, yoxsa biz bu məsələlərdə həddi keçmişik?

Axı bu nəyə lazımdır? Niyə şəxsi, hətta kiməsə görə intim olan məsələləri bu qədər rahat sosiallaşdırırıq? Dinimizdə də deyilir ki, yasdan tez çıxmaq məsləhətdir. Biz isə bir gün ölən insanı bir neçə ay ərzində “basdırırıq”.

Allah bütün ölənlərimizə rəhmət eləsin.

Bu qədər…

Emin Əfəndi

Sfera.az

Yazıları Emin Əfəndinin teleqram kanalından izləyə bilərsiniz: //t.me/efendi19

"Bir gün ölən insanı bir neçə ay ərzində "basdırırıq""... - Emin Əfəndi yazır...