Naxçıvan Hava Limanında adi bir gün: Bilet növbəsi... - Emin Əfəndinin qələmindən

Naxçıvan Hava Limanı: Bilet

Birinci hissə. 

Əgər dünyada 90-cı illərin ab-havasını qoruyub saxlamaq üçün muzey yaratmaq istəsələr, Naxçıvan Hava Limanı ideal namizəd olardı. Çünki burada keçirdiyiniz hər dəqiqə sizi vaxt maşını ilə keçmişə aparır.

2025-ci ildə belə, Naxçıvanda təyyarə bileti almaq müasir texnologiyaların gətirdiyi rahatlıqdan uzaqdır. Bilet əldə etmək istəyirsinizsə, əvvəlcə aerokassaya gedib uzun növbədə gözləməlisiniz. Saatlarla gözlədikdən sonra kassadakı xanımlardan biri soyuqqanlılıqla bildirir:

– Nə danışırsan? Yalnız iki həftədən sonra!

Bu, prosesin sadəcə başlanğıcıdır. İndi işə “adam” tapmaq mərhələsi başlayır. “Adam” məsələsi həll olunandan sonra yenidən aerokassaya qayıdırsınız. Burada isə başqa bir sürprizlə qarşılaşırsınız:

– Mənə heç kim, heç nə deməyib.

Lakin tanışlığınızın gücünə görə vəziyyət bir qədər irəliləyir. Amma indi də sizdən şəxsiyyət vəsiqəsinin surətini gətirmək tələb olunur. Şəxsiyyət vəsiqəsi yox, məhz surəti! Bütün müasir texnologiyaların mövcud olduğu bir dövrdə belə, aerokassada “bu mühüm işlə” məşğul olan mütəxəssis yerində olmadığından siz Naxçıvan küçələrində kseroks axtarmağa məcbur olursunuz.

Nəhayət, qayıdıb yenidən növbəyə durursunuz. Bilet çap olunur və siz rahat nəfəs almağa çalışırsınız. Amma həmin an Bakıda taksi sürücülərinin belə çoxdan unutduğu bir ifadə ilə qarşılaşırsınız:

– Nəğd ödəyə bilməzsən? Çöldə bankomat var, ya karta ata bilərsən.

Mən isə kədərli şəkildə masanın üstündə düz qabağımdakı heç kəsə lazım olmayan və illərlə öz şansını gözləyən post-terminal aparatına nəzər yetirirəm…

Bura qədər gəlib çıxan hər kəs üçün bu artıq “qələbə” sayılır.

Hava Limanında. İkinci hissə

Bütün bu mərhələləri keçdikdən sonra nəhayət Naxçıvan Hava Limanına çatırsınız. Burada isə fərqli bir aləmə düşürsünüz. Adam əlindən, daha doğrusu ayağından tərpənmək olmur. Sanki “Böyük Depressiya” zamanındakı Nyu-York birjasına, ya da Kuba inqilabından sonra ölkəni tərk edən xaricilər arasındasınız.

Yeni ili evdə keçirmək ümidi ilə gələn əsgərlər, yasa və yaxud toya tələsən ağbirçəklər, tələbələr, Bakıya Türkiyədən gələn qardaşlar və daha kimlər və kimlər… Naxçıvan əhalisinin qonaqpərvərliyi və səmimiyyətindən tamamilə fərqlənən bir ab-hava hökm sürür burada. Hava limanının əməkdaşları sanki paralel reallıqda yaşayırlar. Kimdənsə bir sual soruşmaq böyük bir nailiyyət sayılır – cavab ala bilmək isə artıq möcüzədir.

Biz hava limanına bir neçə reysin təxirə salındığı vaxtda gəldik. Ola bilsin ki, bəzi problemlər məhz bu vəziyyətdən qaynaqlanırdı. Reysin təxirə salınması və insanların buna hazır olmaması böhran vəziyyəti yaratmışdı. Belə hallarda hazırlıqlı olmaq vacibdir. Çünki məhz böhran vəziyyətlərində bütün çatışmazlıqlar üzə çıxır.

Nəysə, başımız çox ağrıdı. Bəzilərimiz baş ağrısı dərmanı tapmaq üçün aptek axtarmaq qərarına gəldi. Lakin aptek soruşduğumuz əməkdaşın cavabı Cem Yılmazın və hətta rəhmətlik Jvanetskinin dilinə düşə biləcək qədər gülməli və düşündürücü oldu:

(Naxçıvan ləhcəsi ilə oxu)

– Bədbəxt, bu aeroportda camaat təyyarə tapa bilmir, sən aptek axtarırsan!

Hələ bu da son deyil. İkinci mərtəbədəki kafedə yemək üçün əyləşdik. Lakin məlum oldu ki, menyuda olan yeganə seçim – sosiska çörək – artıq bitib. Yemək üçün, deyəsən, həqiqətən də Bakıya uçmaq lazım idi.

Miri Yusif konserti. Üçüncü hissə. 

Bütün bu hadisələrə baxmayaraq, Naxçıvan əhalisinin səmimiyyəti və qonaqpərvərliyi hər çətinliyi unudurdu. Bu insanlar sanki qədim nəciblik ruhunun daşıyıcılarıdır. Onların yardıma hər zaman hazır olması və mehribanlığı hava limanındakı qeyri-adi təcrübələri belə kölgədə qoyur.

Bu arada, bütün bu macəralar fonunda möhtəşəm Naxçıvan konsertimiz baş tutdu! Yanvarın 3-də Naxçıvan Administrasiyası, Naxçıvan şəhər icra hakimiyyəti və əziz Naxçıvanlıların dəstəyi sayəsində unudulmaz bir gecə yaşadıq. Miri Yusif və bütün komandamız adından doğma Naxçıvanlılara bizə bəxş etdikləri tükənməz enerji və isti qəbula görə dərin minnətdarlığımızı bildiririk.

Həqiqətən də, Naxçıvanın havası, suyu və tamaşaçı sevgisi ayrı bir möcüzədir.

Hörmətli AZAL, bu insanlar hava limanındakı çətinliklərə layiq deyillər. Onlar daha yaxşı sistemləri haqq edirlər. Amma bütün bunlara baxmayaraq, Naxçıvan həmişə ürəyimizdə xüsusi bir yer tutacaq – hətta hava limanındakı macəralarla belə.

Emin Əfəndi

Sfera.az 

Yazıları Emin Əfəndinin teleqram kanalından izləyə bilərsiniz: //t.me/efendi19